Boliviyadagi yo‘l-transport hodisasida 21 kishi halok bo‘ldi

Boliviyaning markaziy qismida avtobusning jarga qulashi oqibatida kamida 21 kishi halok bo‘ldi. Bu haqda mamlakat prezidenti Luis Arse ma'lum qildi.

“Biz Kochabamba departamentidagi Morochata shahri yaqinida avtobus ishtirokidagi yo‘l-transport hodisasida 21 kishi halok bo‘lgani va 12 kishi jabrlangani haqida qayg‘uli xabar oldik. Qurbonlar oilalariga hamdardlik bildiramiz”, deb yozgan Arse Twitter’da.

Unitel telekanalining xabar berishicha, Kilyakolo shahriga yo‘nalayotgan avtobus 200 metr balandlikdan qulagan. Hozirda shifoxonada bo‘lgan avtobus haydovchisining ta'kidlashicha, u yo‘lda ko‘tarilgan chang sababli oldinda ketayotgan mashinani kech payqagan va u bilan to‘qnashishdan qochish uchun avtobusni keskin to‘xtatishga majbur bo‘lgan. Buning oqibatida u avtobus boshqaruvini yo‘qotgan va transport vositasi jarga qulagan.