Bahrom Abduhalimov «Adolat» partiyasidan prezidentlikka nomzod sifatida tasdiqlandi

Bugun, 8 sentabr kuni Toshkentda “Adolat” SDPning X qurultoyi bo‘lib o‘tdi. 

Kun.uz muxbiri xabariga ko‘ra, tadbirda 24 oktyabr kuni bo‘lib o‘tadigan O‘zbekiston prezidenti saylovida partiya tomonidan ishtirok etadigan nomzodni tasdiqlash masalasi ko‘rib chiqildi.

Qayd etilishicha, delegatlar "Adolat" partiyasi markaziy kengashi raisi Bahrom Abduhalimovni prezidentlikka nomzod sifatida ma'qullashdi.

Ma'lum qilinishicha, nomzod 2020 yildan boshlab partiya rahbari sifatida faoliyat yuritib kelmoqda.

Bahrom Abduhalimov 1959 yil 27 fevralda Toshkent shahrida tavallud topgan. Toshkent davlat universitetini tamomlagan (1981 yil). O‘zbekiston Fanlar akademiyasi Sharqshunoslik institutida kichik, katta ilmiy xodim, bo‘lim boshlig‘i, ilmiy kotib, ilmiy ishlar bo‘yicha direktor o‘rinbosari, direktor, O‘zbekiston prezidenti davlat maslahatchisi lavozimlarida ishlagan. Tarix fanlari doktori, Markaziy Osiyo tarixi va sharqshunoslik sohasidagi olim.

U 2011-2020 yillarda Fanlar akademiyasi vitse-prezidenti lavozimida ishlagan. 2020 yilning oktyabrida “Adolat” SDP siyosiy kengashi raisi etib saylangan.

O‘zbekiston prezidenti saylovi kampaniyasiga 23 iyul kuni start berildi. Saylovlarda 5 ta partiya – “Adolat” SDP, “Milliy tiklanish” DP, O‘zLiDeP, XDP va O‘zbekiston Ekologik partiyasi o‘z nomzodini ilgari surish huquqiga ega. Saylov 24 oktabr kuni bo‘lib o‘tadi.