Fransiya AQSh va Avstraliyadagi elchilarini chaqirtirib olishga qaror qildi

Tashqi ishlar vaziri Jan-Iv Le Drianning qayd etishicha, ushbu qaror Fransiya prezidenti Emmanuel Makronning ko‘rsatmasiga asosan qabul qilingan.

Foto: REUTERS / Christophe Petit Tesson/Pool

AUKUS alyansini tuzish to‘g‘risidagi kelishuv imzolanganidan so‘ng Fransiya AQSh va Avstraliyadagi elchilarini chaqirtirib olishga qaror qildi. Bu haqda Al Jazeera telekanali xabar berdi.

Fransiya tashqi ishlar vaziri Jan-Iv Le Drianning qayd etishicha, ushbu qaror Avstraliya va AQShning "jiddiy bayonotlari" sababli Fransiya prezidenti Emmanuel Makronning ko‘rsatmasiga asosan qabul qilingan.

Vazir shuningdek, Avstraliyaning Fransiya suvosti kemalarini sotib olish bo‘yicha shartnomani bekor qilishini "nomaqbul harakat" deb atadi.

Avvalroq AQSh, Britaniya va Avstraliya o‘rtasida mudofaa sohasida yangi alyans – AUKUS’ga asos solindi.

Alyansning birinchi tashabbuslaridan biri sifatida Avstraliyani suvosti kemalari bilan ta'minlash ko‘rsatilgan. Shu sababli Avstraliya Fransiya bilan suvosti kemalari yetkazib berish bo‘yicha shartnomadan chiqqan. Parij o‘z ittifoqdoshlarining bu qarorini “orqadan pichoq sanchish” deb baholagan.