Yevropada guruhlarda so‘nggi tur. Italiya vazifani uddalay olmadi, Angliya 10ta gol urdi 

JCh-2022. Saralash turniri. Yevropa. C guruhi
Shimoliy Irlandiya — Italiya — 0:0
Shimoliy Irlandiya: Pikok-Farrell, J.Evans, Katkart, Flenagan, Lyuis, Deyvis, Magennis, Dallas, Sevill (K.Evans, 72), Makkann, Uayt (Vashington, 72).
Italiya: Donnarumma, Bonuchchi, Acherbi, Emerson (Skamakka, 80), Di Lorenso, Jorjino (Lokatelli, 69), Barella (Belotti, 64), Keza, Tonali (Kristante, 46), Insine (Bernardeski, 68), Berardi.
Ogohlantirishlar: Tonali, 9. Magennis, 57. Pikok-Farrell, 83.
Hakam: Kovach (Ruminiya).
15 noyabr. Belfast. «Uindzor Park» stadioni.

«Italiya Shveytsariya ustidan g‘alaba qozonishga haqli edimi?» savoli biroz g‘alati eshitiladi. Nazariy jihatdan Yevropaning amaldagi chempionlari hozirgidan ham yomonroq holatga tushishi mumkin edi, ammo ularda bir tur avval to‘g‘ridan to‘g‘ri yo‘llanma uchun juda yaxshi imkoniyat bor edi. Ammo Jorjino Shveytsariyaga qarshi prinsipial o‘yinda 11 metrdan yana gol ura olmadi, endi uning bu xatosi shunchaki tasodif sifatida yoddan chiqishi ham, JCh-94 finalidagi Roberto Badjoning penaltisi kabi bir umr yodda qolishi ham mumkin.

Ha, o‘shanda jahon chempionati finali edi, hozirgi vaziyatda o‘rtaga faqat mundial yo‘llanmasi tikilgandi, lekin «skuadra adzurra» sakkiz yildan buyon futboldagi bu asosiy turnirda ishtirok etmagan. O‘yindan keyin Roberto Manchini yomon narsalar haqida o‘ylamaslikka chaqirib, Qatar yo‘llanmasi uchun kurash bahordagi o‘yinlarda ham davom etishini eslatmoqda. U o‘z so‘zlarida bu turnirda «Uindzor Park»dagi o‘yinlarda biror marta gol o‘tkazmagan raqibga ham hurmat mujassam edi. Qolaversa, italyanlar hech qachon Belfastda g‘alaba qozona olmagan, 64 yil muqaddam esa bu yerda ularning JCh-1958 uchun yo‘llanma qo‘lga kiritish orzusi chilparchin bo‘lgandi.

«Masala biz qanday o‘ynashimizda», — deya qayd etdi Manchini. Aytish kerakki, «adzurri» so‘nggi vaqtlarda tarkibda yo‘qotishlarga uchradi, Kellini, Immobile, Pellegrini, Verratti, Dzanolo, Bastoni, Kalabriya va Biragi safdan chiqqan. Yuqoridagi ro‘yxatning kamida ilk to‘rt vakili boshlang‘ich tarkibning doimiy futbolchilari edi va murabbiylar shtabi Belfastdagi o‘yin uchun Dzappakosta va Ferrarini tarkibga chaqirishiga to‘g‘ri keldi.

Ixtiyoridagi tarkibdan kelib chiqqan holda Manchini yaqqol markaziy hujumchisiz sxemani tanladi. Hujum uchligi markazida asosan qanotlarda o‘ynashga odatlangan Insine joylashdi, uni qanotlarda Berardi va Keza qo‘llab-quvvatladi. Ehtimol, italyanlarning rejasi shimoliy irlandiyaliklarning chuqur himoyasini futbolchilarning individual harakatlari evaziga yorib o‘tish bo‘lgandir. Lekin bunday urinishlar raqib darvozasiga jiddiy xavf tug‘dira olmadi.

Aytish mumkinki, mezbonlar darvozaboni Pikok-Farrell ilk 45 daqiqalikni chigalyozdi rejimida o‘tkazdi, darvozabonning yagona yorqin seyvi esa — u Kezaning zarbasini oyoqlari bilan qaytargandi — «Yuventus» forvardi ofsaydda bo‘lgani tufayli ahamiyatini yo‘qotdi. Qolgan pallalarda mehmonlar o‘zlarining kam sonli imkoniyatlariga juda ehtiyotkorlik bilan yondashishdi. Raqib ilk marta qarshi hujumga imkon bergan vaziyatda ham himoyachilarni aldab o‘tgan Insine to‘pni osonlik bilan darvozabonning qo‘llariga tutqizdi.

Tanaffusga qadar Yevropa chempionlarini qanoatlantirib turgan narsa — Lyutsernda parallel kechayotgan uchrashuvda asosiy hujumchilari Seferovich va Embolosiz harakat qilayotgan shveysariyaliklar ham Bolgariya darvozasiga yo‘l topa olmagani edi. Ammo nimanidir o‘zgartirish kerak edi va Manchini boshlang‘ich tarkibdagi hujumchilar o‘rnini o‘zgartirmagan holda birinchi bo‘limda sariq kartochka olgan Tonali o‘rniga Kristanteni tushirish bilan kifoyalandi.

Ammo tanaffusdan mezbonlar ham o‘zgargan holda qaytishdi, xuddi mezbon muxlislar zerikib qolayotganini sezgandek. Ikkinchi bo‘limda mezbonlarda vaziyatlar ko‘proq bo‘ldi, hujumga qo‘shilgan Lyuisning tashlab bergan to‘pidan keyin Sevilla hisobni ochishi mumkin edi, ammo Donnarumma yaqin masofadan yo‘llangan kuchli zarbani qaytardi. Xuddi shu vaqtda Okafor Shveytsariyani onlayn rejimda JCh-2022ga olib chiqayotgandi.

Keza raqib jarima maydoni markazida turib to‘pni darvoza burchagiga aniq yo‘naltira olmagan pallada esa Lyutsernda hisob 2:0 ko‘rinishini oldi. Manchini nihoyat zaxirada yaqqol markaziy hujumchi Belotti ham borligini eslab qolganida esa, shveysariyaliklar uchinchi golni urishdi, ammo VAR Gavranovichning golini bekor qildi. Ya'ni, bu holatda ham Italiyani Qatardan birgina aniq zarba ajratib turgandi. Ammo Lyutsernda baribir uchinchi gol urilgach , «adzurri» missiyasi uddalab bo‘lmas topshiriqqa aylangandi - endi ular to‘plar nisbati bo‘yicha shveysariyaliklardan ustun bo‘lishi uchun safarda 2 to‘p farqi bilan g‘alaba qozonishi talab etilardi.

Agar Bonuchchi o‘yin so‘ngida Vashingtonning zarbasini darvoza chizig‘i ustida to‘xtatib qolmaganida, bu haqiqiy kamsitilish bo‘lardi. Ammo bu qahramonlik hech narsani o‘zgartirmadi. Belfastdagi o‘yin tugaganidan keyin ham shveysariyaliklar gol urishda davom etishdi, Yevropaning amaldagi chempionlari esa Qatarga borish uchun endi keyingi yil bahorida bo‘lib o‘tadigan pley-off o‘yinlarida qatnashishi kerak bo‘ladi. Shveytsariya termasini Yevro-2020dan keyin qabul qilib olgan Murat Yaqin esa jahon chempionatiga to‘g‘ridan to‘g‘ri yo‘llanmani qo‘lga kiritdi.

Shveytsariya — Bolgariya — 4:0 (Okafor, 48. Vargas, 57. Itten, 72. Froyler, 90+1).
Shveytsariya – Zommer, Sher (Sou, 90), Vidmer, Mbabu, Fray, Shakiri (Ebisher, 90), Zakariya, Vargas (Zekiri, 79), Froyler, Okafor (Shteffen, 68), Gavranovich (Itten, 68). 

F guruhi
Shotlandiya — Daniya — 2:0 (Sauttar, 35. Adams, 86).
Shotlandiya – Gordon, O’Donnell, Tirni (Ralston, 87), Kuper, Roberson (Makkenna, 79), Makginn, Gilmor (Maklin, 74), Kristi (Armstrong, 80), Makgregor, Suttar, Adams. 
Daniya – Shmeyxel, Kristensen, Vestergor, Mele, Vass (Dreyyer, 81), Bruun Larsen (Sisto, 56), Yonsson (Stage, 56), Kristensen (Ba, 81), Olsen, Ker, Kornelius (Ure, 72).

Isroil — Farer orollari — 3:2 (Dabbur, 30, penaltidan. Vaysmann, 58. Perets, 74 — Vatnhamar, 62. K.Olsen, 72).

Avstriya — Moldaviya — 4:1 (Arnautovich, 4, 55, penaltidan. Trimmel, 21. Lyubichich, 83 — Nikolaesku, 60).

I guruhi
San-Marino — Angliya — 0:10 (Maguayr, 6. Fabbri, 15, avtogol. Keyn, 27, penaltidan, 31, 39, penaltidan, 42. Smit-Rou, 58. Mings, 69. Abraham, 78. Saka, 79).
Angliya – Remsdeyl, Maguayr (Chiluell, 46), Mingz, Koudi, Aleksander-Arnold, Foden (Abraham, 46), Fillips (Gallaher, 46), Smit-Rou (Stounz, 73), Bellingem, Saka, Keyn (Jyeyms, 63).
Chetlatish: Rossi (68).

Polsha — Vengriya — 1:2 (Sviderski, 61 — Shafer, 37. Gozdog, 80).
Polsha – Shchensni, Puxach (Plaxeta, 83), Davidovich, Bednarek, Kesh (Yuzvyak, 46), Moder (Zelinski, 46), Linetti (Frankovski, 65), Klix, Kendzera, Shviderski, Piontek (Milik, 65). 
Vengriya – Dibus, Nego, Lang, Fiola, Nad, Varga (Gazdag, 59), Shafer, Shen (Kishsh, 72), Nad (Vechei, 90), Salai, Salai (Xan, 89).

Albaniya — Andorra — 1:0 (Chekichi, 73, penaltidan).

Shu tariqa, JCh-2022da ishtirok etishi aniq bo‘lgan jamoalar soni 11taga yetdi: mezbon Qatardan tashqari, saralash o‘yinlarida Germaniya, Braziliya, Fransiya, Belgiya, Xorvatiya, Serbiya, Ispaniya Angliya va Shveytsariya yo‘llanmani qo‘lga kiritdi.

JChga chiqish uchun pley-offda qatnashishi kerak bo‘lgan 12 jamoadan 10tasi ma'lum: Portugaliya, Italiya, Rossiya           Shotlandiya, Uels, Shvetsiya, Polsha, Shimoliy Makedoniya, Avstriya (Millatlar Ligasi orqali) va Chexiya (Millatlar Ligasi orqali). Qolgan 2 jamoa nomi (Niderlandiya/Turkiya/Norvegiyadan biri va Finlandiya/Ukrainadan biri) bugun ma'lum bo‘ladi.