Mass-media fondi vasiylik kengashi raisi o‘rinbosari, O‘zbekiston Gender tengligini ta'minlash bo‘yicha komissiyasi a'zosi Saida Mirziyoyeva Birlashgan Arab Amirliklariga tashrifi chog‘ida qator uchrashuvlar o‘tkazdi.
Saida Mirziyoyeva Dubayda «Expo-2020» butunjahon ko‘rgazmasi doirasidagi Leadership Expo-2020 pavilonida Birlashgan Arab Amirliklari davlat taraqqiyoti va kelajagi masalalari vaziri Oxud bint Xalfan Al-Rumi bilan uchrashdi.
«Aytish kerakki, BAA — so‘nggi 50 yilda insonlar, ayniqsa, ayollar uchun xavfsiz hududga, dunyoning eng taraqqiy etgan mamlakatlaridan biriga aylandi. Uchrashuvda ijtimoiy-iqtisodiy masalalar yuzasidan fikr almashdik, ko‘plab sohalar bo‘yicha o‘zaro hamkorlik qilish istiqbollarini muhokama qildik», deydi Mass-media fondi vasiylik kengashi raisi o‘rinbosari.
Uchrashuvda Oxud bint Xalfan Al-Rumi Luvrda bo‘lib o‘tadigan O‘zbekiston ko‘rgazmasiga katta qiziqish bildirayotganini ta'kidladi. U Jahon banki reytinglaridan birida bosh islohotchi sifatida tilga olingan O‘zbekiston ajoyib yurt ekani va qadimiy shaharlarni ko‘rish orzusida ekanini aytgan.
Shuningdek, Expo-2020 doirasida yana bir muhim uchrashuv BAAning xalqaro hamkorlik bo‘yicha davlat vaziri, Expo-2020 bosh direktori Rim Al-Hoshimiy bilan bo‘lib o‘tdi.
«Expo-2020 Dubai xalqaro ko‘rgazmasining qamrovi va madaniy xilma-xilligi hayratga sazovordir. Bu global maydon 190dan ortiq mamlakatni jamladi», deydi Saida Mirziyoyeva.
Bundan tashqari, Mass-media fondi vasiylik kengashi raisi o‘rinbosari safar davomida BAA madaniyat va yoshlar ishlari vaziri Nura Al-Kaabi bilan uchrashdi.
«Suhbat chog‘ida O‘zbekistonning Expo-2020 doirasida o‘tkaziladigan «Al-Burda» festivalidagi ishtirokini muhokama qildik. Al-Kaabi xonim O‘zbekistonning Islom dunyosida o‘rni muhim ekanini alohida ta'kidlab o‘tdi», deydi Saida Mirziyoyeva.
Mass-media fondi vasiylik kengashi raisi o‘rinbosari BMT Ayollar qo‘mitasining Yevropa va Markaziy Osiyo bo‘yicha mintaqaviy direktori va Turkiyadagi vakili Aliya Al-Yosir bilan ham uchrashuv o‘tkazdi.
«Aliya xonim O‘zbekistonning so‘nggi yillarda gender masalalarini hal etish bo‘yicha erishgan natijalariga yuqori baho berdi. U Markaziy Osiyo mamlakatlaridan kelgan qizlar uchun yozgi maktab yaratish g‘oyasini qo‘llab-quvvatladi, shuningdek, mamlakatimizda BMT Ayollar qo‘mitasining vakolatxonasini ochishni taklif etdi», deyiladi Saida Mirziyoyevaning xabarida.
Avvalroq, Dubaydagi Dubai Opera sahnasida «Lazgi — qalb va muhabbat raqsi» balet postanovkasining xalqaro premerasi bo‘lib o‘tgandi.
Ma'lumot uchun, Dubayda «Expo-2020» butunjahon ko‘rgazmasi bo‘lib o‘tmoqda. Unda so‘nggi yillarda mamlakat ilmiy va iqtisodiy yutuqlari, madaniy merosi va sayyohlik salohiyati, shuningdek, Yangi O‘zbekistonni rivojlantirish rejasi, investitsiya imkoniyatlari keng xalqaro jamoatchilikka namoyish etilayotgan O‘zbekiston Milliy paviloni o‘z ishini amalga oshirmoqda.
