Xalq ta'limi vaziri Qoraqalpog‘istondagi eng olis 3 ta tuman maktablariga bordi 

Xalq ta'limi vaziri Baxtiyor Saidov Qoraqalpog‘istonning Mo‘ynoq, Qo‘ng‘irot va Qonliko‘l tumanlaridagi maktablarga bordi. Bu haqda Xalq ta'limi vazirligi xabar berdi.  

1 dekabr kuni Xalq ta'limi vaziri Baxtiyor Saidov maktablarda yaratilgan sharoitlarni o‘rganish maqsadida Qoraqalpog‘iston Respublikasiga kelgan. O‘rganish ishlarini Qo‘ng‘irot tumanidagi 33-maktabdan boshlagan.

Vazirning keyingi manzili ushbu tumandagi 490 o‘ringa mo‘ljallangan 40-maktab bo‘ldi. Koeffitsiyenti yuqori bo‘lgan va ayni paytda 1000 nafar o‘quvchi bilim olayotgan maktab uchun yangi bino qurilishini investitsiya dasturiga kiritish hamda boshlang‘ich sinf o‘quvchilarining bepul ovqatlanishi uchun sharoit yaratish bo‘yicha tuman hokimi bilan kelishib olgan.

Maktablardagi muammolarni o‘rganish Mo‘ynoq hududida davom etgan. Vazir Mo‘ynoq tumanidagi informatika va axborot texnologiyalarini chuqurlashtirib o‘qitishga ixtisoslashtirilgan 8-umumta'lim maktabiga borgan.

Baxtiyor Saidov ta'lim muassasa o‘quvchilari uchun barpo etilgan yotoqxonani tez fursatlarda jihozlar bilan ta'minlash va keyinchalik iqtidorli bolalarni tanlab olish orqali uni maktab-internatiga aylantirishni taklif qilgan. Maktabga kompyuter sinf jamlanmasi hamda elektron doska sovg‘a qilindi.

Shundan so‘ng vazir Qonliko‘lda joylashgan 24-umumta'lim maktabida bo‘lgan. Homiylik mablag‘lari asosida qurilayotgan 180 o‘rinli yangi maktab binosi ko‘zdan kechirilgan. Mazkur maktab binosining qurilishi ayni damda maktabning eski binosida tahsil olayotgan 101 nafar bolaning zamonaviy sharoitlarda ta'lim olish imkoniyatini yaratadi.

Qurilish ishlari yakuniga yetgach, maktabga yuqori malakali o‘qituvchilarni jalb qilish hamda iqtidorli bolalar uchun ixtisoslashgan sinf ochish takliflari ilgari surildi, deyiladi rasmiy xabarda.

Hozirda boshqa ishga o‘tgan sobiq Xalq ta'limi vaziri Sherzod Shermatov Qoraqalpog‘istonga joriy yilning sentabr oyida kelgandi.