O‘zbekiston va Kuvayt o‘rtasida mehnat migratsiyasi to‘g‘risida hukumatlararo bitim imzolanadi

O‘zbekistonning Kuvaytdagi elchixonasi ko‘magida O‘zbekiston bandlik va mehnat munosabatlari vazirligi huzuridagi Tashqi mehnat migratsiyasi agentligi va Kuvayt ishchi kuchlari bo‘yicha agentligi o‘rtasida onlayn-muzokaralar tashkil etildi, deb xabar bermoqda «Dunyo» AA.

Muzokaralar chog‘ida xavfsiz, tartibli va qonuniy mehnat migratsiyasi tashkil etilishiga yo‘naltirilgan hukumatlararo bitim loyihasi ko‘rib chiqilgan.

«Kuvayt vakillari ko‘p asrlik do‘stlik, o‘zaro ishonch va qo‘llab-quvvatlash tamoyillariga asoslangan ikki tomonlama munosabatlar darajasini yuqori baholar ekan, bu tamoyillar siyosiy, savdo-iqtisodiy va madaniy-gumanitar sohalardagi aloqalarda o‘z aksini topayotganini ta’kidladi», deyiladi xabarda.

Kuvayt agentligi O‘zbekiston elchixonasi bilan birgalikda o‘zbekistonlik malakali ishchi kuchlarini Kuvaytga ishlashga jalb etish bo‘yicha izchil ish olib bormoqda, ularning huquq va manfaatlarini himoya qilish mexanizmi yo‘lga qo‘yilgan. Hozirgi paytda Kuvaytda tibbiyot, ta’lim, madaniyat va xizmat ko‘rsatish singari sohalarda 200 nafardan ortiq O‘zbekiston fuqarosi mehnat faoliyatini olib bormoqda.

Muzokaralar chog‘ida Kuvayt tomoni ularning bilim va malakasi darajasini hisobga olgan holda o‘z mamlakati iqtisodiyotining barcha jabhalarida ishlashi uchun o‘zbek mutaxassislarining sonini bir necha barobarga oshirishdan manfaatdor ekani ma’lum qilindi.

Muzokaralar yakuni bo‘yicha Mehnat migratsiyasi to‘g‘risidagi hukumatlararo bitimning imzolanishi O‘zbekiston va Kuvayt o‘rtasidagi o‘zaro manfaatli hamkorlikni yanada rivojlantirish hamda ikki mamlakat xalqlari o‘rtasidagi do‘stona aloqalarni rivojlantirishga xizmat qilishi yuzasidan har ikki tomon komil ishonch bildirdi.

Fors ko‘rfazida joylashgan Kuvayt davlatida qariyb 4,5 million kishi istiqomat qiladi. Aholining 31 foizi mahalliy kuvaytliklar bo‘lib, qolgan qismini mehnat migrantlari tashkil etadi. Aholining 100 foizi shaharlarda istiqomat qiladi.

Avvalroq Kuvayt amiri mamlakat yangi hukumatini tuzish to‘g‘risida farmon chiqargani haqida xabar berilgan edi.