Hindiston kompaniyasi Namanganda zamonaviy agrosanoat klasteri tashkil etadi

Vazirlar Mahkamasining “Namangan viloyatida zamonaviy agrosanoat klasterini tashkil etish chora-tadbirlari to‘g‘risida”gi qarori loyihasi e’lon qilindi.

Qishloq xo‘jaligi vazirligi, Namangan viloyati hokimligi va “Indo Organics” aksiyadorlik jamiyati qo‘shma korxonasi (Hindiston) tomonidan Namangan viloyatida agrosanoat klasteri tashkil etish loyihasini amalga oshirish to‘g‘risidagi taklifiga rozilik beriladi.

Mazkur loyiha doirasida kannabis va boshqa qishloq xo‘jaligi mahsulotlarini yetishtirish uchun Namangan viloyatidagi qishloq xo‘jaligida foydalanilmayotgan yerlar hisobidan 3,7 ming gektar yer maydoni 25 yil muddatga ijara huquqi asosida kannabis yetishtirish faoliyati uchun hamda 2 gektar yer maydoni ishlab chiqarish kompleksi qurish uchun o‘rnatilgan tartibda litsenziya olish va yer uchastkasi normativ qiymatining ikki baravari miqdoridagi pul mablag‘ini depozitga qo‘yish sharti bilan ajratib beriladi.

Namangan viloyati hokimligi Davlat soliq qo‘mitasi huzuridagi Kadastr agentligi bilan birgalikda investorga yer uchastkasi normativ qiymatining ikki baravari miqdoridagi pul mablag‘i depozitga qo‘yilgandan so‘ng Namangan viloyati Pop tumani Chodak massivi Qo‘shminor hududidagi qishloq xo‘jaligida foydalanilmaydigan 3,7 ming gektar yer maydonini belgilangan tartibda ajratib berilishini hamda 25 yil muddatga ijara shartnomasi tuzilishini ta’minlaydi.

Agrosanoat klasteri tashkil etish loyihasini amalga oshirish doirasida quyidagilar investorning investitsiya majburiyatlari hisoblanadi:

• qishloq xo‘jaligi ekinlarini yetishtirishning zamonaviy va samarali uslublarini, ilg‘or agrotexnik va suvni tejaydigan sug‘orish texnologiyalarini joriy etish;
• Namangan viloyatida agrosanoat klasteri loyihasini amalga oshirish uchun umumiy qiymati 45 mln dollar to‘g‘ridan to‘g‘ri xorijiy investitsiyalarni jalb etgan holda kannabis o‘simligini qayta ishlashning samarali usullarini va ularni chuqur qayta ishlash texnologiyalarini joriy etish;
• yetishtirilgan qishloq xo‘jaligi mahsulotlarini chuqur qayta ishlash hamda 100 foiz eksportga yo‘naltirish;
• ilmiy-tadqiqot muassasalari bilan birgalikda kannabis o‘simligining va boshqa qishloq xo‘jaligi ekinlarining birlamchi urug‘chiligini tashkil qilish, yangi navlari va duragay urug‘larini yaratish hamda ular mahsulotlarini qayta ishlashning samarali texnologiyalarini yaratish bo‘yicha tadqiqotlar olib borish.