Bo‘stonliqda rasmga tushmoqchi bo‘lgan yigit sharsharadan yiqilib tushdi

Kecha, 2 may kuni soat 15:00 da Toshkent viloyati Bo‘stonliq tumani Yangi qo‘rg‘on qishlog‘iga tabiat qo‘ynida dam olish uchun borgan fuqarolardan biri “Soy mazor” sharsharasi tepasiga chiqib, rasmga tushmoqchi bo‘lgan va ehtiyotsizligi oqibatida tepalikdan yiqilib, o‘ng oyog‘ining son qismini sindirib olgan.

Foto: FVV matbuot xizmati

Bu haqda viloyat FVBga xabar kelib tushgan, FVV ma’lumotiga ko‘ra, voqea joyiga zudlik bilan Bo‘stonliq tumani Chimyon yong‘in-qutqaruv otryadi qutqaruvchilari yetib borib, jabrlangan fuqaroga birinchi tibbiy yordam ko‘rsatgan va tepalikdan olib tushib, tez tibbiy yordam xodimlariga topshirgan.

Malakaviy tibbiy yordam ko‘rsatish uchun Bo‘stonliq tumani markaziy shifoxonasiga yuborilgan.

“Hurmatli dam oluvchilar! Tog‘li hududlarda harakat qilganda ehtiyotkorlik choralarini ko‘rishingizni so‘rab qolamiz”, deyiladi Favqulodda vaziyatlar vazirligi axborotida.