“Aholining togʻli hududlarda mazmunli hordiq chiqarishi va turistlar uchun yanada qulay sharoit yaratish maqsadida Boʻstonliq tumanidagi turizm maskanlariga qoʻshimcha transport qatnovlari yoʻlga qoʻyilmoqda”, deb xabar berdi Turizm qoʻmitasi.
Xabarga koʻra, Boʻstonliqdagi turistik maskanlarga olib boruvchi 324M va 325M-sonli “Chinorkent temir yoʻl bekati – Beldersoy” mikroavtobus yoʻnalishlari Amirsoy va Chimyon orqali harakatlanadi.
Odatiy kunlarda ushbu yoʻnalishlarda 20 ta mikroavtobus soat 6:00 dan 18:30 gacha har 15 daqiqada qatnaydi. Jami 86 ta qatnov amalga oshiriladi.
Bayram va qoʻshimcha dam olish kunlarida qatnovlar soat 5:30 dan boshlanadi va har 10 daqiqada amalga oshiriladi. 324M yoʻnalishda qatnovlar 22:06 gacha, 325M yoʻnalishda esa 22:00 gacha davom etadi. Harakat tarkibi mos ravishda 15 va 16 tagacha oshiriladi. Natijada qatnovlar soni 158 taga yetkaziladi.
Toshkent–Boʻstonliq yoʻnalishida 1226-sonli “Mashinasozlar metro bekati – Xumson qoʻrgʻoni (Chorvoq)” avtobus yoʻnalishida 3 ta avtobus muntazam qatnaydi. Dam olish va bayram kunlari talabga qarab yana 1 dona avtobus zaxiraga chiqariladi.
