London «DXR»dagi britaniyaliklar taqdirini Moskva bilan emas, Kiyev bilan muhokama qiladi

Buyuk Britaniya rasmiylari «Donetsk xalq respublikasi»da qirollik fuqarolari o‘lim jazosiga hukm qilingani masalasini Rossiya bilan emas, balki Ukraina bilan muzokaralarda muhokama qiladi. «Bizning ustuvor vazifamiz Ukraina hukumati bilan birgalikda ularni imkon qadar tezroq ozod qilishga harakat qilish», dedi Buyuk Britaniya bosh vaziri Boris Jonsonning rasmiy vakili 10 iyun, juma kuni. 

Shuningdek, u Britaniya tashqi ishlar vaziri Liz Trass ukrainalik hamkasbi Dmitriy Kuleba bilan suhbatda bu masalani ko‘targanini aytdi. Buyuk Britaniya britaniyalik Eyden Aslin va Shon Pinnerni ozod qilish uchun Rossiya bilan muzokara olib boradimi, degan savolga javoban Dauning-strit Rossiya rasmiylari bilan «doimiy aloqa» yo‘qligini bildirdi. Bundan tashqari, Aslin va Pinner «Ukraina qurolli kuchlari harbiy xizmatchilari sifatida Jyeneva konvensiyasi himoyasida» ekani ko‘rsatib o‘tildi. 

Ayni paytda, BMT Ukraina tomonida jang qilgan va Rossiya tomonidan asirga olingan ikki britaniyalik va bir marokashlik «DXR»da o‘lim jazosiga hukm qilingani haqidagi xabarlardan tashvish bildirdi. «BMTning inson huquqlari bo‘yicha oliy komissari boshqarmasi o‘zini mustaqil deb e’lon qilgan «Donetsk xalq respublikasi»da «Oliy sud» sifatida ko‘riluvchi muassasa tomonidan uch nafar harbiy xizmatchiga nisbatan chiqarilgan o‘lim jazosi hukmidan tashvishda», - deya Jyenevada jurnalistlarga ma’lum qildi boshqarma rasmiy vakili Ravina Shamdasani. 

U «DXR» va «LXR»da inson huquqlarining jiddiy buzilishi holatlarini tilga oldi. «2015 yildan buyon biz o‘zini mustaqil deb e’lon qilgan «respublikalarda» sud tizimi adolatli sud jarayonining asosiy kafolatlari bo‘lgan ochiq eshituvlar, sudlar mustaqilligi va xolisligi, ko‘rsatma berishga majburlamaslik kabi huquqlarga amal qilmayotganini kuzatdik. Harbiy asirlar ustidan bunday sud jarayoni harbiy jinoyatga tenglashtiriladi», - dedi Shamdasani. 

Rasmiy Berlin ham Ukraina sharqidagi Kiyev nazorati ostida bo‘lmagan mintaqada chiqarilgan o‘lim jazo hukmini keskin tanqid qildi. Bu xabarlar dahshatli, dedi Germaniya Tashqi ishlar vazirligi vakili. «Fuqaroligidan qat’i nazar, qurolli kuchlar xizmatchilari, jumladan, Ukraina tomonida jang qilayotgan harbiy xizmatchilar jangovar harakatlar ishtirokchilari hisoblanadi va xalqaro gumanitar huquqqa muvofiq alohida himoyadan foydalanishi lozim», — deya qo‘shimcha qildi u. 

Federal hukumat bunday qarorlarni Rossiyaning «xalqaro gumanitar huquq elementar tamoyillariga to‘liq e’tibor bermasligi»ning yana bir dalili deb hisoblaydi, dedi Germaniya TIV vakili. 

Kuni kecha Rossiya davlat OAVlari Ukrainadagi harbiy mojaroda ishtirok etgan britaniyalik Eyden Aslin va Shon Pinner, shuningdek, marokashlik Saudun Braxim Rossiya nazoratidagi Donetskda sudga tortilgani va ular «yollanma askar sifatida tan olinib, «DXR»da hokimiyatni egallab olish va «konstitutsiyaviy tuzum»ni ag‘darishga qaratilgan xatti-harakatlar sodir etganlikda aybdor» deb topilgani haqida xabar bergan edi. Uchala shaxs ham o‘lim jazosiga hukm qilindi. Ular hukmlar ustidan shikoyat qilish va afv etish imkoniyati haqida xabardor qilingan.