Demokratlar va respublikachilar minimal murosaga keldi, u 21 yoshgacha bo‘lgan shaxslarga qurol sotish bo‘yicha qat’iy qoidalarni qo‘llash imkonini beradi.
AQShda Demokratik va Respublikachi partiyalardan bir guruh senatorlar o‘qotar qurol sotish qoidalarini qat’iylashtirish bo‘yicha takliflar tayyorladi. 20 nafar senator bu tashabbusni 12 iyun, yakshanba kuni e’lon qildi.
Senatorlar 21 yoshgacha bo‘lgan potensial qurol sotib oluvchilarni tekshirishni kuchaytirishni, shtatlarga qurollarning xavfli deb topilgan odamlar qo‘liga tushmasligidan saqlash uchun ko‘proq resurslar taqdim etishni, milliy ma’lumotlar bazasiga oiladagi zo‘ravonlik bo‘yicha sudlanganlik va taqiqlovni qo‘shishni taklif qilmoqda.
Takliflar ikki tomon vakillari erishgan qurollarni erkin sotishni cheklash masalasi bo‘yicha minimal murosaga kelishni ifodalaydi. Umuman olganda, respublikachilar bu sohani qattiq tartibga solishga qarshi turishda davom etmoqda. Tashabbusni kamida 10 nafar respublikachi senator qo‘llab-quvvatlagani bois, uning asosida tayyorlangan qonun loyihasi AQSh Senatida kerakli ovozlarni olishi mumkin.
Hozirgi taklif Texas va Nyu-Yorkda yaqinda sodir bo‘lgan otishmalarga javob bo‘lib, ularning ikkalasi ham ko‘p sonli qurbonlarga olib keldi. Texasdagi boshlang‘ich maktabda 19 nafar bola va ikki o‘qituvchi, Nyu-Yorkda esa 10 nafar qora tanli fuqaro supermarketda o‘ldirildi. Murosaga 11 iyun kuni AQSh shaharlarida qurol-yarog‘larning erkin sotilishiga qarshi bo‘lib o‘tgan yirik namoyishlardan bir kun o‘tib erishildi.
Prezident Jo Bayden senatorlarning tashabbusini olqishladi va ularni tegishli qonunni imkon qadar tezroq qabul qilishga chaqirdi, ammo bu choralar yetarlicha emasligini ta’kidladi. Bayden avvalroq qattiqroq cheklovlar, jumladan Texas va Nyu-Yorkda qo‘llanilgan miltiqlarni sotishni taqiqlash yoki ularni sotib olish yoshini oshirishni taklif qilgan edi. Bundan tashqari, prezident qonunchilarni ayrim do‘konlarni taqiqlashga, o‘qotar qurollarni xavfsiz saqlash bo‘yicha kafolat berishga va qurol ishlab chiqaruvchilarni o‘z mahsulotidan foydalangan holda sodir etilgan jinoyatlar uchun javobgarlikka tortishga ruxsat berishga chaqirdi.
Iyun oyida demokratlar tomonidan nazorat qilinadigan vakillar palatasi ko‘plab yarim avtomatik miltiqlarni sotib olish yoshini 18 yoshdan 21 yoshga oshirishni o‘z ichiga olgan keng qamrovli takliflarni qabul qildi. Ammo demokratlar uni respublikachilar ko‘pchilikni tashkil etuvchi Senatda ma’qullash uchun zarur bo‘lgan ovozlarga ega emas.
