Yevropol Kiyev bilan birga qurol kontrabandasiga qarshi kurashda hamkorlik qiladi

Yevropol Ukraina rasmiylari bilan Yevropa ittifoqida qurol savdosi xavfini kamaytirish uchun yaqindan hamkorlik qilmoqda. Bu haqda YeI politsiya xizmatining 22 iyul, juma kuni e’lon qilingan bayonotida aytiladi. Yevropa muvofiqlashtiruvchi organi o‘qotar qurollarni kuzatish va qidirish masalasida Ukraina tomoniga ishonishlarini hamda 2017 yilda operativ bitim imzolanganidan beri Kiyev bilan hamkorlik yo‘lga qo‘yilganidan mamnun ekanliklarini qayd etdi. 

Ukraina huquq-tartibot idoralari «Rossiyaning davom etayotgan harbiy tajovuziga qaramay, YeI ichki xavfsizligi uchun manfaatdor bo‘lgan ishlar» doirasida o‘zaro hamkorlikni davom ettirmoqda», — deya bildirdi Yevropol.

Yevropa politsiya xizmati Ukrainada o‘qotar qurol va o‘q-dorilarning aylanmasi ularning ma’lum kontrabanda yo‘llari yoki onlayn-platformalarda sotish orqali YeIga noqonuniy yetkazib berilishining oshishiga olib kelishi mumkinligini tan oldi. Yevropol «mojaro tugaganidan keyin tahdid yanada kuchayishi mumkinligi» haqida ogohlantirdi. 

Avvalroq Yevropol matbuot kotibi Yan Op Gen dpa agentligiga uning xizmati qora bozorda Ukrainadan o‘qotar qurol va boshqa harbiy tovarlar savdosi holatlarini qayd etganini ma’lum qilgandi. Ayrim YeI davlatlarining huquq-tartibot idoralari og‘ir qurollar ham sotilishini istisno etmayapti. «U uyushgan jinoiy guruhlar yoki terrorchilar qo‘liga tushib qolish xavfi bor», — dedi Yevropol vakili. 

Darknetda, uning so‘zlariga ko‘ra, Britaniyaning Javelin olib yuriluvchi zenit-raketa majmuasi sotuvga qo‘yilgan. Shu bilan birga, Yevropol bunday takliflar «g‘arb qurollarini yetkazib berishga salbiy munosabatni shakllantirish maqsadida Rossiya tashviqotining bir qismi» bo‘lishi mumkinligini istisno etmayapti. 

Yevroparlamentda So‘llar partiyasining Germaniyadan bo‘lgan deputati O‘zlem Alev Demirel Ukrainaga bundesver tomonidan yetkazib berilayotgan qurollar ham noqonuniy yo‘llar bilan YeIga kirishi yoki qora bozorga tushishi mumkinligidan xavotir bildirdi. 

Bundestagdagi «Ittifoq-90/Yashillar» fraksiyasi raisi o‘rinbosari, parlamentning maxsus xizmatlarni nazorat qilish qo‘mitasi a’zosi Konstantin fon Nots kontrabandaning oldini olish uchun quroldan foydalanish ustidan samarali nazoratni joriy etish zarur, degan fikrni bildirdi.