Yevroittifoq Ukrainaga yangi makromoliyaviy yordam taqdim etishni boshladi

Yevrokomissiya (YeK) 1 avgust, dushanba kuni Ukrainaga makromoliyaviy yordam sifatida 500 mln yevro yubordi, deb xabar beradi YeK sayti. Bu paketning birinchi yarmi bo‘lib, uning umumiy miqdori 1 mlrd yevroni tashkil etadi. Ikkinchi transh 2 avgust kuni yuboriladi. 

Yangi makromoliyaviy yordam ko‘rsatish to‘g‘risidagi qaror Yevroparlament va YeI kengashi tomonidan 2022 yil 12 iyulda qabul qilingan. U 2022 yil 18 maydagi YeK xabarida e’lon qilingan va 2022 yil 23-24 iyun kunlari Yevropa kengashi tomonidan tasdiqlangan 9 mlrd yevrogacha bo‘lgan favqulodda makromoliyaviy yordam paketining birinchi qismidir. 

Yangi yordam YeI tomonidan yilning birinchi yarmida Ukrainaga taqdim etilgan yordamga, shu jumladan 1,2 mlrd yevrolik favqulodda kreditga qo‘shiladi. Shu tariqa, urush boshlanganidan beri Ukrainaga berilgan makromoliyaviy yordamning umumiy miqdori 2,2 mlrd yevroga yetadi. 

Mablag‘lar Ukrainaga imtiyozli shartlarda uzoq muddatli kreditlar ko‘rinishida taqdim etiladi. Ular Ukrainaga «Rossiyaning asossiz tajovuzidan so‘ng shoshilinch moliyaviy ehtiyojlarini qondirishga» yordam berish uchun mo‘ljallangan, deyiladi xabarda. 

Ukraina bosh vaziri Denis Shmigal YeIdan yangi makromoliyaviy yordamning birinchi transhi olinganini tasdiqladi. Uning so‘zlariga ko‘ra, Milliy bank hisobiga 500 million yevro tushgan, ikkinchi transh esa 2 avgust kuni kelishi kutilmoqda. 

«1 mlrd yevro - Ukrainaga urushning moliyaviy oqibatlarini bartaraf etishda jami 9 mlrd yevrolik katta yordam paketi bir qismi. Mablag‘lar ustuvor budjet ehtiyojlarini moliyalashtirishga yordam beradi», deb yozdi Shmigal Telegram’da. U YeIga ushbu yordam uchun minnatdorchilik bildirib, uni «umumiy iqtisodiy-moliyaviy barqarorlik va xavfsiz kelajakka qo‘yilgan muhim sarmoya» deb atadi.