Apple o‘z smartfonlari uchun chipsetlar ishlab chiqaradigan Tayvanning TSMC kompaniyasidan mahsulotlarni «Tayvan, Xitoyda ishlab chiqarilgan» yoki «Tayvan, Xitoy» yorliqlari bilan eksport qilishni so‘radi. Chipsetlar Xitoyga – iPhone'lar yig‘iladigan eng katta zavodlarga yetkazib beriladi.
Bu masala 2-3 avgust kunlari AQSh Kongressi Vakillar palatasi spikeri Nensi Pelosining Tayvanga tashrifi ortidan kuchaygan ziddiyat tufayli yetkazib berishda uzilishlar bo‘lmasligi uchun ko‘tarilgan.
Pelosining tashrifiga javoban Xitoy orol bilan savdo aloqalarini qisman to‘xtatib, ba’zi mahsulotlar uchun tekshiruvni kuchaytirmoqda. Xususan, chipsetlardagi «Tayvanda ishlab chiqarilgan» degan yozuv mahsulotlarning bojxonada uzoq vaqt ushlanib qolishiga yoki umuman Xitoyga kiritilmasligiga sabab bo‘lishi mumkin.
The Guardian nashriga ko‘ra, Tayvan eksport mahsuloti «Tayvan» nomi bilan yoki davlatning rasmiy nomi «Xitoy Respublikasi» deb yozilishini talab qilmoqda.
Ushbu muammo sababli sentabrda bo‘lishi kutilayotgan iPhone 14 liniyasidagi telefonlarning taqdimoti kechikishi taxmin qilinmoqda.
Lekin kupertinoliklar allaqachon iPhone 14 taqdimotini tasvirga olish jarayonlarini boshlab yuborgan. iPhone 14 liniyasining eng arzon qurilmasi 800 AQSh dollaridan, Max turlari esa 1200 dollardan boshlanishi kutilmoqda.
Taqdimot 13 sentabrda, sotuvlar esa 23 sentabrdan boshlanishi kutilmoqda.
