Shvetsiya Mudofaa vazirligi rahbarining aytishicha, mamlakat Ukrainaga yordam ko‘rsatishning «uch yo‘nalishida» – harbiy tayyorgarlik, minalardan tozalash va qurol ishlab chiqarishda ishtirok etadi.
Shvetsiya mudofaa vaziri Piter Xultkvist qirollik Ukraina uchun qurol ishlab chiqarishi mumkinligini ma’lum qildi. «Men buni istisno qilmayman, lekin aytishga hali erta», — dedi u 11 avgust, payshanba kuni SVT telekanaliga bergan intervyusida, o‘sha kuni Kopenhagenda bo‘lib o‘tgan Ukraina uchun donorlar konferensiyasi natijalariga izoh berib.
Anjumanda 17 davlat mudofaa idoralari rahbarlari ishtirokida Ukrainani uzoq muddatli qo‘llab-quvvatlashning uchta asosiy yo‘nalishi – harbiy tayyorgarlik, minalardan tozalash va qurol ishlab chiqarish belgilandi. «Biz uchala sohada ham ishtirok etmoqdamiz, ammo keyin hammasi qanday amalga oshishini ko‘ramiz», dedi Xultkvist va Stokholm Ukraina harbiylarini Buyuk Britaniyada tayyorlash dasturidagi ishtirokini kengaytirishi mumkinligini qo‘shimcha qildi.
Shvetsiya vazirining so‘zlariga ko‘ra, Slovakiya, Polsha va Chexiya allaqachon Ukraina uchun qurol ishlab chiqarishga qiziqish bildirgan. «Ukrainaga to‘g‘ridan to‘g‘ri yetkazib berilishi mumkin bo‘lgan qurollarni ishlab chiqarish uchun turli mamlakatlardagi ishlab chiqarish liniyalaridan foydalanish haqida gapiryapmiz, - dedi Xultkvist. - Biz mojaroning cho‘zilishini kutyapmiz, shu sababli hozirgacha yetkazib berilgan mahsulotlar qo‘shimcha to‘g‘ridan to‘g‘ri ishlab chiqarish bilan to‘ldirilishi kerak deb hisoblaymiz».
Rossiyaning Ukrainaga bostirib kirishi boshlanganidan beri Shvetsiya Kiyevga bir necha partiya qurol yetkazib berdi. Xususan, mart oyida Stokholm 5000 ta tankka qarshi qurol jo‘natilishini e’lon qildi. Shu bilan birga, rasmiylar Ukraina tomoniga himoya vositalari, dronlar va durbinlar topshirilishini e’lon qildi. Iyun oyi boshida Shvetsiya Ukrainaga kemaga qarshi raketalar, tanklarga qarshi qurollar va 12,7 millimetrli miltiqlar, jumladan, o‘q-dorilarni yuborishga qaror qildi.
