Gulagu.net loyihasi asoschisiga Fransiyada suiqasd uyushtirildi

Gulagu.net inson huquqlari loyihasi asoschisi Vladimir Osechkinning xabar berishicha, bir necha kun oldin uni oilasi bilan yashaydigan Fransiyaning Biarrits shahrida otib ketmoqchi bo‘lishgan. Bellingcat loyihasining bolgariyalik tergovchi jurnalisti Xristo Grozev qotillik oldini olishga yordam berdi, u suiqasd tayyorlanayotgani haqida ogohlantirdi, dedi huquq himoyachisi 19 sentabr, dushanba kuni kechqurun Yuliya Latininaning YouTube-kanalida.

«Uning va manbasining xabari menga hamda xavfsizligim va himoyam bilan shug‘ullanganlarga qotillikning oldini olishga yordam berdi», dedi Osechkin. Uning so‘zlariga ko‘ra, bo‘lajak qotillik haqida ma’lumot olganidan so‘ng u oilasi bilan ikki kunga tog‘ga ketgan, qaytib kelganida esa suiqasdga urinish sodir etilgan. 

U terrasada bo‘lgan va ko‘z qiri bilan uyning devori bo‘ylab o‘zi tomon harakatlanayotgan sharpani payqagan. «Biz maxsus tayyorgarlikdan o‘tgandik, bunga tayyorgarlik ko‘rdik, o‘qitildik, nima bo‘lsa ham ikkilanmaslik va bizni topishmasligi uchun harakat qildik. Eng himoyalangan xonalardan birida bolalarim va xotinim ikki soat davomida polga yotib yashirishdi», - dedi rossiyalik huquq himoyachisi. 

Voqea joyiga politsiya yetib kelgan va qo‘shnilarni so‘roq qilgan, ular o‘q ovozini eshitishgan. Osechkinning so‘zlariga ko‘ra, u o‘qotar quroldan uzilgan. «Ular menga tegmadi, o‘q uzildi, meni nishonga olinshdi», deb ta’kidladi u hamda qotilning xatolari va reaksiyasi yashin tezligi omon qolishiga yordam berganini qo‘shimcha qildi. Gulagu.net asoschisi suiqasd bo‘yicha qo‘zg‘atilgan jinoiy ish doirasida olib borilayotgan tergov sirini hisobga olib, qo‘shimcha ma’lumot bermadi. Shu bilan birga, Osechkinning aytishicha, bu urinishga Rossiyadan buyurtma berilgan va u «FXX, uyushgan jinoyatchilik bilan chambarchas bog‘liq» shaxs tomonidan tayyorlangan.

2020 yil iyul oyida Moskvaning Golovinskiy sudi 2015 yildan beri Rossiyadan tashqarida yashab kelayotgan Osechkinni firibgarlik ishi bo‘yicha sirtdan hibsga oldi. Gulagu.net Rossiya koloniyalari va qamoqxonalaridagi qiynoqlar haqidagi ma’lumotlarni bir necha bor e’lon qilgan. Xususan, 2021 yil oktyabr oyida Gulagu.net Saratovdagi 1-sonli sil kasalxonasida mahkumlarni qiynash va jinsiy zo‘ravonlik ishlatish holatlari aks etgan bir nechta videolarni e’lon qildi. Bu Saratov oblasti bo‘yicha Federal jazoni ijro etish xizmati rahbarining iste’foga chiqishiga, idora 18 nafar xodimining ishdan bo‘shatilishiga, jinsiy zo‘ravonlik va mansab vakolatini suiiste’mol qilish faktlari bo‘yicha bir qator jinoiy ishlarning qo‘zg‘atilishiga olib keldi.  

Gulagu.net huquq himoyachilari qamoq jazosini o‘tayotib, sil kasalxonasida videokuzatuv kameralari ma’muri bo‘lib ishlagan Sergey Savelevdan mahbuslarning qiynoqlari aks etgan 40 gigabayt videoyozuvlarni olgan. Video e’lon qilingandan so‘ng Savelev Fransiyaga jo‘nab ketdi va u yerdan siyosiy boshpana so‘radi. Rossiyada u kompyuter ma’lumotlariga noqonuniy kirishda ayblanib, qidiruvga berilgan.