Gretsiya bosh vaziri Erdo‘g‘an bilan uchrashishga tayyorligi ma’lum qilindi

Gretsiya bosh vaziri Kiriakos Mitsotakis ushbu haftada Pragada Turkiya prezidenti Rajab Toyyib Erdo‘g‘an bilan uchrashishga tayyor. Bu haqda Kathimerini nashri hukumat rasmiy vakili Ioannis Ikonomga tayanib xabar berdi.

"Agarda o‘z bayonotlari bilan keskinlikni kuchaytirgan Turkiya prezidenti Gretsiya bosh vaziri bilan uchrashadigan bo‘lsa, Gretsiya tomoni bunga ijobiy javob qaytaradi", - deya Ikonomning so‘zlaridan iqtibos keltirgan nashr.

Turkiya va Gretsiya o‘rtasidagi munosabatlar 23 avgust kuni Turkiya samolyotlari Egey dengizi ustida Gretsiyaning S-300 havo hujumidan mudofaa tizimlari nishoniga olinganidan so‘ng keskinlashdi.

Turkiya hukumati harbiy samolyotlari Gretsiya tomonidan ta’qib qilinishi masalasini NATO darajasida ko‘tarib chiqishini ma’lum qildi.

Sentyabr boshlarida Erdo‘g‘an Gretsiyani tarixdan saboq olishga chaqirgandi.