O‘zbekiston prezidentining Afg‘oniston bo‘yicha maxsus vakili Saudiya Arabistoniga tashrif buyuradi

O‘zbekiston elchisi Ulug‘bek Maqsudov Saudiya Arabistoni Tashqi ishlar vazirligi Siyosiy ishlarni rejalashtirish bosh boshqarmasi boshlig‘i o‘rinbosari va vazirlik afg‘on masalalari bo‘yicha maxsus guruh raisi Abdulloh bin Xolid bin Saud al-Kabir Ol Saud bilan uchrashdi, deb xabar bermoqda «Dunyo».

Tomonlar o‘rtasida O‘zbekiston va Saudiya Arabistoni o‘rtasida afg‘on inqirozini hal etishda o‘zaro hamkorlik aloqalarini yo‘lga qo‘yish va jadallashtirish, Afg‘onistonda amalga oshirilayotgan loyihalarga Saudiya tomoni mablag‘larini jalb etish masalalari muhokama qilindi.

Shahzoda Abdulloh bin Xolid Ol Saud joriy yil 25-26 iyul kunlari Toshkentda Afg‘oniston bo‘yicha tashkil etilgan xalqaro konferensiyada o‘zi boshchiligidagi Saudiya Arabistoni delegatsiyasi ishtiroki xususida to‘xtalar ekan, tadbir yuqori saviyada o‘tganini ta’kidladi. Uning aytishicha, konferensiya Afg‘onistonda barqarorlik, xavfsizlik, urushdan keyingi tiklanishga ko‘maklashish, ko‘p millatli afg‘on xalqi va butun dunyo manfaatlari yo‘lida ushbu mamlakatni mintaqaviy hamkorlik jarayonlariga integratsiyalashuvini ta’minlash kabi masalalarni yechishda muhim maydonga aylandi.

Uchrashuv yakunida O‘zbekiston ishtirokida Afg‘onistonda amalga oshirilayotgan loyihalarda Saudiya tomoni ishtirokini ta’minlash bo‘yicha muzokaralarni davom ettirish va bu yo‘nalishdagi munosabatlar istiqbollarini muhokama qilish maqsadida O‘zbekiston prezidentining Afg‘oniston bo‘yicha maxsus vakilining Saudiya Arabistoniga tashrifini tashkil etish yuzasidan kelishuvga erishildi.