07:22 / 19.11.2022
1676
Уммон Ўзбекистонда ишлаб чиқарилган қуруқ мевалар экспорти ҳажмини оширмоқчи

Ўзбекистон элчихонасида республикада ишлаб чиқарилган маҳсулотлар экспортини ошириш ҳамда маҳаллий корхоналар фаолиятини қўллаб-қувватлаш мақсадида Уммоннинг Azhar компанияси раҳбари Солиҳ ал-Зажжалий билан учрашув ўтказилди, деб хабар бермоқда “Дунё”.

Фото: Dunyo

Суҳбат давомида мамлакатда ишлаб чиқарилаётган ва хорижга экспорт қилинаётган озиқ-овқат маҳсулотлари, қуритилган мевалар сифати ва бу йўналишда фаолият олиб бораётган корхоналар ҳақида маълумот берилди. Солиҳ ал-Зажжалий айтишича, ҳозирги вақтда Ўзбекистонда мева-сабзавотларни етиштириш ва қайта ишлаш бўйича катта тажриба тўпланган ва бу маҳсулотларни экспорт қилиш учун етарлича салоҳият мавжуд. Улар ўз сифати ва таъми жиҳатидан араб бозорлари эътиборини тортмоқда.

Солиҳ ал-Зажжалий Azhar компаниясининг «соғлом овқатланиш» дастури доирасида келгусида Уммон ва Яқин Шарқ минтақаси давлатларига ўрик, узум, шафтоли, олхўри, анжир ва бошқа қуритилган меваларни экспорт қилиш истагини билдирар экан, бу маҳсулотлар тайёрланиш жараёнларини кўздан кечириш ва экспортчи компаниялар таклифларини ўрганиш мақсадида жорий йил ноябрь ойи охирида Ўзбекистонга боришни режалаштираётганини маълум қилди.

Top