Masqatda hujjatsiz qolgan bola O‘zbekistonga qaytarildi

O‘zbekiston elchixonasi tomonidan Masqatdagi suriyaliklar xonadonida hech qanday hujjatlarsiz qoldirib ketilgan, 2023 yilda tug‘ilgan o‘zbekistonlik bolaga tegishli hujjatlar rasmiylashtirilib, O‘zbekistonga qaytarildi, deb xabar qilmoqda “Dunyo” AA.

Ma’lum qilinishicha, bola tug‘ilganida onasi tomonidan tug‘ruqxonaga nikoh tuzilganligi haqidagi guvohnoma taqdim etilmagani sababli, chaqaloqqa hech qanday hujjat rasmiylashtirish imkoni bo‘lmagan. Shuningdek, bolaning onasiga nisbatan Ummonda jinoiy ish ochilgani bois, u tug‘uruqxonani yashirincha tark etgan.

Qayd etilishicha, ona bolasini suriyalik oilaga “vaqtincha qarab turish” bahonasi bilan qoldirib, O‘zbekistonga qochib ketgan. Suriyalik oila esa bolaga ikki yil davomida o‘z farzandidek munosabatda bo‘lib, parvarishlagan. Hozirgi vaqtda Suriyada tinchlik o‘rnatilgani sababli, mazkur oila o‘z vatanlariga qaytishga qaror qilgan va bolani O‘zbekiston elchixonasiga topshirib, Suriyaga jo‘nab ketgan.

Shu bilan birga, 2023 yilda Ummondan O‘zbekistonga qochib kelgan ona 2024 yilda boshqa jinoyatlari uchun O‘zbekistonda hibsga olingani va hozirda jazo muddatini o‘tayotgani ma’lum qilingan.

Elchixona tomonidan bolaning hujjatlarini rasmiylashtirish maqsadida Ummonning tegishli idoralari bilan olib borilgan muzokaralar natijasida unga tug‘ilganlik haqidagi guvohnoma rasmiylashtirilgan. 18 dekabr kuni bola elchixona xodimi hamrohligida Masqat–Dubay, Dubay–Toshkent yo‘nalishi bo‘yicha O‘zbekistonga qaytarilgan.