Buyuk Britaniya qishda Ukrainaga yordam qilishga va’da berdi

Buyuk Britaniya tashqi ishlar vaziri Jyeyms Kleverli Ukraina rahbariyati bilan uchrashish, ularni qishda va uzoq muddatda qo‘llab-quvvatlashga ishontirish uchun 24 noyabr kuni e’lon qilinmagan tashrif bilan Kiyevga jo‘nab ketdi, deb xabar berdi vazirlik idorasi 25 noyabr, juma kuni. 

«Birlashgan Qirollik Ukraina bilan yelkama-yelka turadi. Qish yaqinlashar ekan, Rossiya tinch aholiga, shifoxonalarga va energetika infratuzilmasiga shafqatsiz zarbalar berib, Ukrainaning qarorini sindirishga urinishda davom etmoqda. Rossiya bunga erisha olmaydi. Qo‘llab-quvvatlashimiz imkon berguncha davom etadi. Bu ajoyib mamlakatga bizning yordamimiz jasur fuqarolarga qarshilik ko‘rsatishga va vayron bo‘lgan narsalarni qayta tiklashga qanday yordam berishini shaxsan ko‘rdim», dedi Kleverli. 

U Ukrainaga muhim infratuzilmani tiklash uchun uch million funt va yana besh million funtni Sudan va Yaman kabi qashshoq mamlakatlarga don yetkazib berish uchun ajratilishini va’da qildi. Kleverlining qayd etishicha, London yordamining salmoqli qismi Ukraina janubidagi yaqinda ozod qilingan hududlarda, jumladan Xersonda infratuzilmani tiklashga sarflanadi. 

Jyeyms Kleverli Ukrainaga Britaniyaning yangi bosh vaziri Rishi Sunak tashrif buyurganidan bir necha kun o‘tib keldi.