Ukrainadagi Zaporijjya atom elektr stansiyasining elektr ta’minoti uzilib qolganidan 1 kun o‘tgach qayta tiklandi.
Bu haqda MAGATE rahbari Rafael Grossi xabar berdi.
Shuningdek, u Ukrainadagi barcha atom elektr stansiyalarining tashqi quvvatdan uzilishi bilan bog‘liq vaziyatni «misli ko‘rilmagan» deb atadi va bundan bir necha oy oldin buni tasavvur qilmaganini aytdi.
«Dunyoning diqqati Yevropadagi eng yirik atom elektr stansiyasi bo‘lgan Zaporijjya AES hududida yuzaga kelgan xavfli vaziyatga qaratilgan bo‘lsa-da, mamlakatdagi boshqa yadroviy inshootlarni ham unutmaslik kerak.
Kecha, birinchi marta Ukrainadagi barcha to‘rtta atom elektr stansiyasi: Zaporijjya, Rivne, Janubiy Ukraina va Xmelnitskiy AES tashqi elektr ta’minotidan uzilib qolgan edi. Ularning barchasi favqulodda dizel generatorlaridan foydalanmoqda», dedi u.
24 noyabr kuni Rossiya tomonidan Ukraina energetika obektlariga berilgan raketa zarbalaridan keyin, 4 ta AES tashqi elektr ta’minotidan uzilib qolgan edi.
Stansiyalarda reaktorlarni sovitish uchun elektr energiyasi talab qilinadi. Energiya uzilib qolgan taqdirda, ular cheklangan vaqt davomida zaxira quvvat bilan ta’minlaydigan favqulodda dizel generatorlariga ulanadi. Zaporijjya AES dizel generatorlari 10 kun davomida energiya berish quvvatiga ega.
