Yevropa Ittifoqi Maskdan Twitter’da yolg‘on ma’lumotlarga qarshi kurashishni talab qildi

30 noyabr kuni Yevropaning ichki bozor bo‘yicha komissari Terri Breton video-aloqa orqali Ilon Maskka qo‘ng‘iroq qildi va unga yaqinda sotib olingan Twitter mikrobloglar platformasi uchun talablar ro‘yxatini e’lon qildi. Gap, xususan, avvalroq taqiqlangan foydalanuvchilarni «o‘zboshimchalik bilan» blokdan chiqarishni rad etish, noto‘g‘ri ma’lumotlarga qarshi «tajovuzkor» kurash va kelasi yilga qadar platformaning «keng mustaqil auditi»ga rozilik berish haqida bormoqda, deb yozadi Financial Times. 

Aks holda, deya ogohlantirdi Brenton, YeI regulyatorlari Twitter Yevropa Ittifoqining yaqinda qabul qilingan raqamli xizmatlar to‘g‘risidagi qonunida (Digital Services Act, DSA) belgilangan standartlarga javob bermaydi degan xulosaga kelishi mumkin. Bunday holda, mini-bloglar xizmati global aylanmasining 6 foizi miqdorida jarimaga tortilishi yoki butun Yevropa Ittifoqi hududida bloklanishi mumkin. Bunga yo‘l qo‘ymaslik uchun Twitter «ko‘p ish qilishiga» to‘g‘ri keladi, dedi Yevropa komissari. 

Mask DSA’ni «juda oqilona» deb atadi va Twitter barcha qonuniy talablarni bajarishiga va’da berdi. Ayni paytda, YeI rahbariyati, FT ma’lumotlariga ko‘ra, Mask noyabr oyida o‘zining 7500 xodimlari yarmidan ko‘pini ishdan bo‘shatganidan keyin platformada buni amalga oshirish uchun yetarli inson resurslari yo‘qligidan xavotirda. 

Mask uzoq davom etgan muzokaralardan so‘ng 28 oktyabr kuni Twitter’ni sotib olish bo‘yicha kelishuvni yakunlaganini e’lon qildi. 20 noyabr kuni u AQSh sobiq prezidenti Donald Trampning akkauntini blokdan chiqardi, unga tarafdorlari 2021 yil yanvarida Kapitoliyga bostirib kirganidan keyin mikrobloglar xizmatidan foydalanish taqiqlangan edi. 

Avvalroq Mask Financial Times nashriga bergan intervyusida Trampning akkauntini bloklash qarorini xato deb bilishini, chunki buning natijasida sobiq prezident «o‘z ovozini yo‘qotmagani»ni aytgan edi. Twitter yangi egasi doimiy taqiqlar faqat botlarga, firibgarlarga yoki spamerlarga qarshi qo‘llanilishi kerak, deb hisoblaydi. 

AQShning Xorijiy investitsiyalar qo‘mitasi Maskning Twitter’ni sotib olish bo‘yicha kelishuvi bilan qiziqishni boshlashi mumkin, dedi moliya vaziri Janet Yyellen The New York Times gazetasiga. Uning so‘zlariga ko‘ra, ushbu bitimda xorijiy kapital ishtiroki milliy xavfsizlikka tahdid soladimi yoki yo‘qmi, shuni tekshirish kerak. Maskka Twitter’ni sotib olish uchun pulni Saudiya shahzodasi Al-Valid bin Talal qarzga bergan.