“Ichki ishlar vazirligi bunga qarshimi?” – parlamentda IIV jamg‘armasidagi pullarning bir qismi budjetga o‘tkazilishi taklifi ma’qullanmadi 

22 dekabr kuni Oliy Majlis Qonunchilik palatasida 2023 yilgi budjet qonuni 2 va 3-o‘qishlarda ko‘rib chiqildi. Deputat Dilmurod Ismoilov parlament e’tiborini kelayotgan yilda sud va prokuratura organlarining budjetdan tashqari jamg‘armalariga soliqlar va yig‘imlar, ma’muriy jarimalar, moliyaviy sanksiyalardan kelib tushadigan mablag‘larning bir qismi respublika budjetiga o‘tkazilishi belgilanayotganiga qaratdi. 

“Ammo juda katta mablag‘lar manbasiga ega bo‘lgan ichki ishlar organlari masalasi e’tibordan chetdan qolgan. Ichki ishlar organlarining budjetdan tashqari mablag‘lari jamg‘armalaridan kelib tushgan mablag‘larni ham nazarda tutish lozim deb hisoblayman”, – dedi deputat. 

Muhokama quyidagicha davom etdi:  

Timur Ishmetov (moliya vaziri): Taklif o‘rinli, mantiqli. Buni ham qabul qilish mumkin deb hisoblaymiz.  

Dilmurod Ismoilov: Kechagi muhokamalarda davlat boshqaruv organlarida ichki ishlarni nazarda tutganmiz degan javob bo‘ldi, ammo ichki ishlar organlari huquqni muhofaza qiluvchi organ hisoblanadi. Juda katta jarimalar (hisobiga) budjetdan tashqari mablag‘lar shakllantirishda katta mablag‘ manbasiga ega.  

Nuriddinjon Ismoilov (spiker): Moliya vazirligi jon deb (Ichki ishlar vazirligini ham) qo‘shadi, ammo bu qanchalik to‘g‘ri, IIVning pozitsiyasi qanday?  

Sharofiddin Nazarov (Budjet va iqtisodiy masalalar qo‘mitasi raisi): Bu masalani ham o‘rganib ko‘rdik, bu bo‘yicha IIV vazirining xati ham bor, unda tushumlarni oshirish masalasi bor.  Bu yilga mo‘ljallangan yangi tadbirlar bor, o‘sha tadbirlarni oshirish uchun... birinchi navbatda yo‘l harakatini tartibga solish masalasi bor, bir qancha boshqariladigan chorrahalarda yangi uskunalar qurish masalasi... 

Nuriddinjon Ismoilov: Demak, tushunishimcha, Ichki ishlar vazirligi bunga qarshimi?  

Sharofiddin Nazarov: Ular bizga kiritgan xatida hatto qo‘shimcha mablag‘ ajratishni so‘ragan.  

Nuriddinjon Ismoilov: Unda, Timur Alimjonovich, sizlar kiritgan variantni qoldiraveraylik, qo‘shilmagan bo‘lsa, qo‘shilmasin. Chunki ular ham mablag‘larini nimadirlarga ajratadi-ku.  

Sharofiddin Nazarov: Hukumat tomonidan ularga vazifalar qo‘yilgan ekan 2023 yil uchun. Uni moliyalashtirish kerak. 

Timur Ishmetov: Aslida biz bunda Ichki ishlar vazirligini ham inobatga olganmiz, bu redaksiyada yuridik kriminologiya tushib qolgandek bo‘lyapti, ammo amaliyotda ham kerak bo‘lgan vaqtda har qanday vaqtda prezident farmoni bilan vazirliklarning budjetdan tashqari mablag‘lari budjetga o‘tkaziladi. Buni ham davom ettiramiz. Vazirlikning daromadlari ko‘proq bo‘lsa, budjetga mablag‘ kerak bo‘lgan vaqtda har qanday vazirlikning jamg‘armalaridan, rozi bo‘ladimi, rozi bo‘lmaydimi, yechib olamiz. 

Nuriddinjon Ismoilov: Demak, hukumat tomonidan (loyiha) qanday kiritilgan bo‘lsa, qoldiramiz.