O‘zbekiston va AQSh maxsus operatsiyalar kuchlari bo‘linmalarini tayyorlashda hamkorlik qiladi

Uchrashuvda O‘zbekiston-AQSh harbiy va harbiy-texnik hamkorligi ustuvor yo‘nalishlari yuzasidan fikr almashildi. Suhbat chog‘ida AQSh Mudofaa vaziri o‘rinbosari joriy yilda nishonlangan ikki tomonlama munosabatlar tarixidagi muhim sanalar, diplomatik munosabatlar o‘rnatilgani 30 yilligi, strategik sheriklik munosabatlari 20 yilligi va Missisipi shtati bilan hamkorlik dasturi 10 yilligi bilan tabrikladi.

Bundan tashqari, mintaqaviy xavfsizlikni ta’minlash, xalqaro terrorizm, uyushgan jinoyatchilik, qurol-yarog‘ va narkotik moddalar noqonuniy aylanishiga qarshi kurashish sohasida hamkorlikni faollashtirish bo‘yicha takliflar ko‘rib chiqildi.

AQSh tomoni O‘zbekiston Markaziy Osiyoda ishonch, sheriklik va yaxshi qo‘shnichilik muhitini yaratish, mintaqada tinchlik va barqarorlikni mustahkamlash borasidagi sa’y-harakatlarini yuqori baholadi. O‘zbekiston va AQShning Afg‘onistondagi vaziyat keskinlashuviga yo‘l qo‘ymaslikdan o‘zaro manfaatdorligi qayd etildi.

Maxsus operatsiyalar kuchlari bo‘linmalarini tayyorlash, qo‘shinlar jangovar tayyorgarligi, harbiy ta’lim sohasida hamkorlikni davom ettirish, O‘zbekiston Qurolli Kuchlari akademiyasi va AQSh Mudofaa vazirligi yetakchi harbiy ta’lim muassasalari o‘rtasida o‘zaro hamkorlikni yo‘lga qo‘yish muhimligi ta’kidlandi.