Iqtisodiyotdagi qonunbuzarliklarni aniqlashda kosmik suratlardan foydalanish joriy qilinadi. Bu haqda Kosmik tadqiqotlar va texnologiyalar agentligi boshqarma boshlig‘i Shohrux Nasrullayev ma’lum qildi.
“Kosmik tarmoqni yanada rivojlantirish bo‘yicha qo‘shimcha chora-tadbirlar to‘g‘risida”gi prezident qarori bilan “O‘zbekkosmos” agentligiga qo‘shimcha vazifalar yuklandi.
Ular quyidagicha:
- kosmik suratlarni qayta ishlash va tahlil qilish orqali iqtisodiyot sohalarida qonunbuzarlik holatlarini aniqlash;
- davlat kosmik monitoringini amalga oshirish bo‘yicha dasturlarni ishlab chiqish va amalga oshirish;
- tegishli vazirlik va idoralar tomonidan amalga oshiriladigan monitoring jarayonlarida kosmik texnologiyalarni qo‘llash bo‘yicha takliflarni tayyorlash;
- sohalarda vazirlik va idoralar tomonidan kosmik texnologiyalarni qo‘llash darajasini monitoring qilish va ularning joriy etilishini jadallashtirish.
