AQSh Ukrainaga Abrams tanklarini yetkazib berishga hali tayyor emas

Qo‘shma Shtatlar hali Ukrainaga Abrams tanklarini yetkazib berish niyatida emas. Bu haqda 18 yanvar, chorshanba kuni AQSh mudofaa vaziri o‘rinbosari Kolin Kal ma’lum qildi, deya xabar beradi AFP. Ushbu qarorga sabab - bu tanklarda «xizmat ko‘rsatish tizimi oson emas» edi. Abrams tanklari qimmat, murakkab tayyorgarlikni talab qiladi va ko‘p yonilg‘i sarflaydi, deya rasmiy so‘zlaridan iqtibos keltirgan AFP.

AQSh mudofaa vaziri Lloyd Ostin ukrainaliklarga ular ta’mirlashi va texnik xizmat ko‘rsatishi mumkin bo‘lmagan hamda uzoq muddatda sotib olishga qurbi yetmaydigan qurollarni yetkazib berishni istamayapti, chunki bu - «befoyda», dedi Kal. «Gap ramziy jihatdan qimmat narsada emas, balki Ukrainaga jang maydonida haqiqatan nima yordam berishida», - dedi mudofaa vaziri o‘rinbosari. Shu bilan birga, Kal Qo‘shma Shtatlar kelajakda Ukrainaga Abrams tanklarini yetkazib berishi mumkinligini butunlay inkor etmadi.

Shu bilan birga, AQSh ma’muriyati Ukrainaga 2,6 milliard dollargacha bo‘lgan yirik harbiy yordam paketini tayyorlashni yakunlamoqda, deya xabar beradi AP. Uning tarkibiga birinchi marta 100 ga yaqin Stryker zirhli mashinalari va kamida 50 ta Bradley jangovar mashinalari kirishi kutilmoqda. Shuningdek, yordamda minglab o‘q-dorilar, jumladan, havo hujumidan mudofaa tizimlari uchun raketalar ham bo‘lishi rejalashtirilgan.

Anonimlik sharti bilan gapirgan rasmiylarning aytishicha, Bayden ma’muriyati harbiy yordam bo‘yicha yakuniy muhokamalarni olib borayotgani sababli raqamlar hali o‘zgarishi mumkin. Ukrainaga yangi yordam paketi yuborilishi shu hafta AQSh, Yevropa va boshqa mintaqalar mudofaa rahbarlari Ukrainaga harbiy yordam berish masalasini muhokama qilish uchun Germaniyada to‘planganda e’lon qilinishi kerak.

Avvalroq The Wall Street Journal va Süddeutsche Zeitung Germaniya AQSh Abrams tanklarini Kiyevga berishga rozi bo‘lgan taqdirda Ukrainaga Leopard 2 tanklarini yetkazib berishni boshlashni rejalashtirayotgani haqida xabar bergan edi. OAV ma’lumotlariga ko‘ra, bu haqda Germaniya kansleri Olaf Shols AQSh prezidenti Jo Bayden bilan telefon orqali muloqotda aytgan.