O‘zbekiston Qirg‘izistondagi yerlarda agrokomplekslar tashkil qiladi

O‘zbekiston va Qirg‘iziston qishloq xo‘jaligi yo‘nalishida hamkorlik bo‘yicha hujjat imzoladi. Bu haqda O‘zbekiston qishloq xo‘jaligi vaziri Aziz Voitov ma’lum qildi.

Uning so‘zlariga ko‘ra, bu hujjat keng tarmoqli yo‘nalishlarni o‘z ichiga olgan yo‘l xaritasi bo‘lib, bunda, asosan, hamkorlikda qiladigan chorvachilik, meva-sabzavotchilik va boshqa shu kabi yo‘nalishlardagi loyihalar kiritildi. 

"Jumladan, chorvachilik yo‘nalishida biz Qirg‘izistondagi yerlardan unumli foydalangan holda, qirg‘iz do‘stlarimiz bilan hamkorlikda chorvachilik komplekslari, mayda shoxli, yirik shoxli qoramollarni boqish, yetishtirish hamda qayta ishlash bo‘yicha agrokomplekslar tashkil qilishni yo‘lga qo‘ymoqchimiz", deydi vazir. 

Aziz Voitovga ko‘ra, O‘zbekistonda meva-sabzavot sohasi ancha rivojlangan. 

"Endi biz qo‘shnilarimizga bu tajribani ulashib, bu yerda boshlanishiga 100 gektar intensiv bog‘, issiqxonalar tashkil qilish bo‘yicha kelishuvlarni amalga oshirdik. Meva-sabzavot mahsulotlarini qayta ishlash bo‘yicha ham birgalikda uchinchi davlatlarga eksport qilish bo‘yicha ham kelishuvlarni amalga oshirdik", dedi u. 

Ma’lum qilinishicha, hozirgi yo‘l xaritasi xususiy tadbirkorlarning taxminan 500 mln dollarlik loyihalarini o‘z ichiga olgan kompleks chora-tadbirlardir.