Aholini zilzilaga tayyorlash tizimi joriy qilinadi

O‘zbekistonda aholiga favqulodda vaziyatlar vaqtida nima qilish kerakligi Yaponiya tajribasi asosida o‘rgatib boriladi. “U yerda har bir tashkilot yilda bir kunini ajratib, zilzilaga tayyorlov markaziga borib, zilzila vaqtida nima qilishni tajriba qilib ko‘radi, biz ham xuddi shunaqa narsa qilmoqchimiz”, deb ma’lum qildi Vazirlar Mahkamasi xodimi. Uning aytishicha, tegishli nizom loyihasi tayyor bo‘lgan.

7 fevral kuni O‘zbekiston Fanlar akademiyasi qoshidagi Seysmologiya institutida dunyo bo‘yicha seysmik faollik ekstremal darajaga ko‘tarilishi mavzusida mutaxassis va OAV vakillari uchrashuvi bo‘lib o‘tdi. Unda O‘zbekiston fuqarolarining zilzilaga qanchalik tayyorligi masalasi ko‘tarildi, deb xabar bermoqda Kun.uz muxbiri.

Favqulodda vaziyatlar vazirligi Seysmoprognostik monitoring markazi boshlig‘i Qahramon Qo‘chqorovning ma’lumot berishicha, O‘zbekistonda zilzila ko‘lamidan kelib chiqib, FVV vazirlik va idoralar o‘rtasida favqulodda vaziyatlarda harakat qilish tizimini ishlab chiqqan. Bundan tashqari, har bitta viloyat o‘zini favqulodda vaziyatlarga tayyorlash bo‘yicha reja ham ishlab chiqadi.

“Deylik, Farg‘ona 8 balli zilzila hududida bo‘lsa, shunday vaziyatda qancha qutqaruvchi, texnika va qutqaruv vositalari kerak – shular rejada belgilanadi. Umuman, bo‘lishi mumkin bo‘lgan har qanday favqulodda vaziyatlar uchun 5 yillik reja ishlab chiqiladi. Chunki 5 yil ichida holatda o‘zgarish bo‘lishi mumkin”, – dedi vazirlik vakili.

Vazirlar Mahkamasi Seysmologiya, inshootlarning seysmik mustahkamligini va seysmik xavfsizlikni ta’minlash sohasini muvofiqlashtirish shu’ba mudiri Diyorbek Bekmirzayevning qo‘shimcha qilishicha, zilzilaga tayyorgarlik bo‘yicha vazirlik va idoralar kesimidagina alohida nizom bor. Oddiy fuqarolarning zilzila vaqtida qanday harakat qilishiga oid nizom yo‘q. Shu’ba mudiri yaqinda shunday muddatli nizom ishlab chiqilgani va tez orada O‘zbekistonda fuqarolar ham zilzilaga tayyorlanish jarayonida ishtirok etishini aytib o‘tdi.

“U nizomda zilzila vaqtida qayerga boriladi, nima qilinadi, shular ko‘rsatiladi. Bu degani butun respublika aholisiga zilzilaga tayyorlanish o‘rgatib chiqiladi. Yaqinda Yaponiyaga borib, ularning tajribasini o‘rgandik. U yerda har bir tashkilot maktab, bog‘cha, oliygoh yoki ishlab chiqarish muassasalari bo‘ladimi, hammasi yilda bir kunini ajratib, zilzilaga tayyorlov markaziga borib, zilzila vaqtida nima qilishni tajriba qilib ko‘radi. Biz ham xuddi shunaqa narsa qilmoqchimiz. Har bir tashkilot Fuqaro muhofazasi institutiga borib, zilzila vaqtida nima qilishni o‘rganib keladi”, – dedi shu’ba mudiri.

Eslatib o‘tamiz, Turkiya va Suriyadagi 6 fevral zilzilalari ortidan O‘zbekiston Favqulodda vaziyatlar vazirligi rasmiy bayonot chiqarib, O‘zbekistonda magnitudasi 5 ballga teng yoki undan katta bo‘lgan zilzila darakchilari aniqlanmaganini ma’lum qilgan, fuqarolardan ortiqcha vahimaga tushmasliklarini so‘ragandi.