Myanmada isyonchilar bazasiga qilingan hujumda 100 ga yaqin odam halok bo‘ldi

Havo hujumi qurbonlari orasida harbiy kiyimdagi jangchilardan tashqari ayollar va bolalar ham bor. Birlashgan Millatlar Tashkiloti harbiy xuntaning harakatlarini keskin qoraladi va zo‘ravonlikni to‘xtatishga chaqirdi.

Myanmada 11 aprel kuni ertalab Sagaing viloyatining chekka Kanbalu qishlog‘idagi isyonchilar bazasiga havo hujumi uyushtirilishi oqibatida o‘nlab odamlar, jumladan, ayollar va bolalar halok bo‘ldi. Mintaqada mamlakatning hukmron harbiy xuntasiga kuchli qarshilik saqlanib qolmoqda.

11 aprel kuni kechqurun harbiy hokimiyat vakilining aytishicha, zarba xalq militsiyasining viloyatdagi vakolatxonasi ochilish marosimi ishtirokchilariga berilgan. Rasmiy qurbonlar soni bo‘yicha aniq ma’lumot yo‘q, faqat halok bo‘lganlar orasida «formadagi jangchilar» ham, «fuqarolik kiyimidagi shaxslar» ham borligi ta’kidlanadi. Vakil, shuningdek, ba’zilar isyonchilar qo‘ygan minalarning portlashi natijasida halok bo‘lganini da’vo qildi.

Isyonchi guruhlardan birining qutqaruvchisi AFP axborot agentligiga halok bo‘lganlar orasida ayollar va bolalar ham borligini aytdi. Uning hisob-kitoblariga ko‘ra, yuzga yaqin odam halok bo‘lgan.

Internetda vayron bo‘lgan binolar o‘rtasida yotgan jasadlar aks etgan videolar e’lon qilingan. G‘arb ommaviy axborot vositalari bu materiallarning haqiqiyligini hali tasdiqlay olmadi. 

BMT bosh kotibi Antoniu Guterrish harbiy xuntaning harakatlarini keskin qoraladi.