Slovakiya Rossiya agressiyasidan himoya qilish uchun qolgan to‘qqizta MiG-29 qiruvchi samolyotini Ukrainaga topshirdi, dedi Slovakiya mudofaa vaziri Yaroslav Nad Facebook’da.
Samolyotlar eng yuqori xavfsizlik choralari bilan quruqlik orqali tashildi, bu muhim va murakkab logistika operatsiyasi edi, deb yozadi u.
Slovakiyaning yana 4 ta MiG-29 qiruvchisi mart oyida Ukrainaga topshirilgandi.
Nadning so‘zlariga ko‘ra, Ukraina harbiylari bu samolyotlarni o‘zlari ta’mirlash va texnik xizmat ko‘rsatish imkoniyatiga ega bo‘ladi. Slovakiya Kiyevni qiruvchi samolyotlar bilan ta’minlagan birinchi davlat bo‘ldi.
Avvalroq Germaniya hukumati Polshaga Ukrainaga beshta MiG-29 qiruvchi samolyotini yetkazib berishga ruxsat bergandi.
Polsha tomoni Germaniyadan tegishli ruxsat so‘ragan edi, sababi samolyot ilgari Varshavaga sobiq GDR arsenalidan o‘tkazilgan edi.
Germaniya mudofaa vaziri Boris Pistorus bu qarorni olqishladi. Uning so‘zlariga ko‘ra, bu «Germaniyaga tayanish mumkin» ekanligini ko‘rsatadi.
