Stoltenberg: Ukraina endi o‘z hududlarini ozod etish uchun yetarlicha qurollarga ega

NATO bosh kotibi Yyens Stoltenberg Ukrainaning Shimoliy Atlantika alyansidagi ittifoqchilari va hamkorlari Kiyevga va’da qilingan texnikalarning deyarli barchasini - 1550 ta zirhli transportyor va 230 tank, shuningdek «ulkan miqdordagi o‘q-dorilar»ni yetkazib berganini ma’lum qildi.

«Ukrainaga va’da qilingan jangovar mashinalarning 98 foizidan ortig‘i allaqachon [Ukraina qo‘mondonligi ixtiyoriga] yetkazib berilgan», dedi Stoltenberg payshanba kuni Bryusselda Lyuksemburg bosh vaziri Ksave Bettel bilan uchrashuvdan keyingi qo‘shma brifing chog‘ida.

Bosh kotibning so‘zlariga ko‘ra, yuborilgan texnikalar va Ukraina qurolli kuchlari ehtiyojlari uchun yetkazib berilgan snaryadlardan kelib chiqib, endilikda Ukraina armiyasi Rossiya qo‘shinlari tomonidan bosib olingan hududlarini ozod etish uchun zarur texnik imkoniyatlarga ega.

Uning aytishicha, hozirda har birida bir necha ming harbiy xizmatchidan iborat to‘qqiz zirhli brigada jihozlangan va o‘qitilmoqda. 

Stoltenberg sifat borasidagi kamchiliklarini son bilan qoplashga urinayotgan Rossiya armiyasining imkoniyatlarini kamsitmaslik kerakligini qayd etgan. «Rossiya tobora ko‘proq fuqarolarni safarbar qilishda davom etmoqda va Baxmut uchun janglarda rossiyaliklar katta yo‘qotishlarga dosh berishga tayyor ekanliklarini ko‘rsatishdi», deya tushuntirdi u. 

U bir kun oldin Ukraina prezidenti Volodimir Zelenskiy va Xitoy rahbari Si Jinping o‘rtasida bo‘lib o‘tgan telefon muloqotiga ham to‘xtalgan. Uning so‘zlariga ko‘ra, NATOdagilar ikki siyosatchining bir yildan oshiq vaqt ichidagi - keng ko‘lamli urush boshidan buyon ilk bor amalga oshirilgan muloqotini olqishlaydi, ammo Xitoy hamon Rossiya bosqinini qoralab chiqmaganiga e’tibor qaratilgan.