Fransiyada 1 may namoyishlari politsiya bilan to‘qnashuvga aylanib ketdi

1 may, dushanba kuni Fransiyaga yuz minglab namoyishchilar prezident Emmanuel Makron tashabbusi bilan boshlangan pensiya islohotiga qarshi namoyishga chiqdi. Hukumat ma’lumotlariga ko‘ra, butun mamlakat bo‘ylab namoyishchilarning umumiy soni 782 mingga yetgan. Kasaba uyushmalari 2,3 million namoyishchi haqida ma’lumot berdi. Bir qator shaharlarda namoyishlar politsiya bilan to‘qnashuvlarga aylangan. Zo‘ravonlik holatlari, xususan, Parij, Lion va Nantda qayd etilgan, deya xabar beradi dpa agentligi.

AFP axborot agentligi xabariga ko‘ra, Parijda namoyishchilar politsiyachilarga narsalar uloqtirgan, bir qancha bank va ko‘chmas mulk oynalarini sindirgan, xavfsizlik kuchlari esa ko‘zdan yosh oqizuvchi gaz va suv purkagichlar bilan javob bergan.

Rasmiylarga ko‘ra, Parijda bir politsiyachining yonuvchi moslama otilgani oqibatida yuzi va qo‘llari qattiq kuygan. Poytaxtda kamida 46 kishi qo‘lga olingan, deb xabar berdi AFP.

Lionda namoyishchilar kamida to‘rtta mashinaga o‘t qo‘ygan, bu yerda 40 kishi qo‘lga olingan. Nantda ham namoyishchilar politsiyaga qarata narsalar uloqtirdi, huquq-tartibot xodimlari ko‘zdan yosh oqizuvchi gaz qo‘lladi.

1 may oqshomida 291 nafar namoyishchi qo‘lga olingan, 108 nafar politsiyachi yaralangan, dedi Fransiya ichki ishlar vaziri Jyerald Darmanen.