Ukraina BMT, Yevroparlament va NATOni “rashizm”ni qoralashga chaqirdi

Ukraina Oliy radasi “rashizm”ni Rossiya Federatsiyasi davlat siyosati asosidagi mafkura va amaliyot sifatida qoraladi. 2 may, seshanba kuni Ukraina parlamenti tegishli bayonotni ma’qulladi, deya ma’lum qildi uning spikeri Ruslan Stefanchuk. Uning so‘zlariga ko‘ra, Rada, shuningdek, BMT, Yevroparlament, PASe, YeXHT Parlament assambleyasi (PA), NATO PA, shuningdek, xorijiy davlatlar hukumatlari va parlamentlariga “rashizm mafkurasi, siyosati va amaliyotini qoralashni qo‘llab-quvvatlash” so‘rovi bilan murojaat qilgan.

Ukraina Oliy radasi tomonidan ushbu tashkilot va muassasalarga yuborilgan hujjat, jumladan, Rossiya prezidenti Vladimir Putinni qoralash va Rossiya Federatsiyasining harbiy-siyosiy rahbariyatini Ukraina va uning xalqiga qarshi tajovuz jinoyati, harbiy jinoyatlar, insoniyatga qarshi jinoyatlar va genotsidni sodir etganlik uchun javobgarlikka tortishga imkon beradigan choralarni ko‘rishga chaqiriqni o‘z ichiga oladi.

Ukraina Oliy radasining “Rossiya Federatsiyasida mavjud siyosiy rejimni rashizm deb belgilash hamda uning mafkuraviy asoslari va ijtimoiy amaliyotini totalitar va insoniyatga qarshi deb qoralash to‘g‘risida”gi bayonoti bo‘yicha qaror loyihasi 13 mart kuni Rada saytida e’lon qilingan.

Hujjatni ishlab chiqishda parlamentning humanitar va axborot siyosati, tashqi siyosat va parlamentlararo hamkorlik, Ukrainaning Yevropa Ittifoqiga integratsiyasi va boshqa qo‘mitalari ishtirok etdi.