BMT: Ukrainada urush boshlanganidan beri 8895 nafar tinch aholi vakili halok bo‘ldi

Rossiya bosqinining boshidan, 2022 yil 24 fevraldan 2023 yil 21 maygacha Ukrainada 8895 nafar tinch aholi vakili halok bo‘ldi, tinch aholi orasida jami yo‘qotishlar 24012 kishini tashkil etyapti, deya xabar beradi Birlashgan Millatlar Tashkilotining Inson huquqlari bo‘yicha Oliy komissari boshqarmasi.

Foto: AP

Uning ma’lumotlariga ko‘ra, Rossiya tajovuzi natijasida 4040 nafar erkak, 2403 nafar ayol, 275 nafar o‘g‘il va 218 nafar qiz bola halok bo‘lgan. Yana 30 nafar bolaning va 1929 nafar kattalarning jinsi hali aniqlanmagan.

Ukrainada urush boshlanganidan beri yaralangan tinch aholining umumiy soni 15117 kishini tashkil etdi, ulardan 445 nafari o‘g‘il bolalar, 314 nafari qiz bolalar va 276 nafari jinsi hali aniqlanmagan boshqa bolalardir.

«BMT Inson huquqlari bo‘yicha Oliy komissari boshqarmasining fikricha, tinch aholi o‘limi yoki jarohatlanganlarning haqiqiy soni ancha yuqori, chunki bunday hodisalar sodir bo‘lgan joylardan olingan ko‘plab xabarlar hali ham qo‘shimcha tasdiqlashni talab qiladi, janglar davom etayotgan ba’zi joylardan olingan ma’lumotlar esa kechikmoqda», deyiladi hujjatda.

Shu tariqa, BMT Rossiya tomonidan bosib olingan Mariupol, Lisichansk, Popasna va Severodonetskda tinch aholi orasida qayd etilgan qurbonlar haqida hali aniq ma’lumot ololmagan.