Eronda Islom inqilobi muhofizlari korpusi (IIMK, Qurolli kuchlarning elit bo‘linmasi) qo‘mondonligi e’lon qilingan tezligi soniyasiga 4,5-5 km bo‘lgan yangi gipertovushli «Fattoh» (JAFB1C005400) raketasini taqdim etdi. Bu haqda Eronning Fars agentligi xabar berdi.
Eron Rossiya, AQSh va Xitoy bilan bir qatorda ushbu texnologiyaga ega bo‘lgan to‘rt davlatdan biriga aylandi. Shu bilan birga, Rossiyaning «Kinjal» gipertovushli raketasi maksimal tezligi «Fattoh»ning e’lon qilingan parametrlaridan kamroq.
Marosimda Eron prezidenti Ibrohim Raisiy, IIMK qo‘mondoni, general-leytenant Husayn Salamiy, IIMK Havo va kosmik kuchlar qo‘mondoni, brigada generali Amir Ali Hojizoda ishtirok etdi.
IIMKning bildirishicha, «Fattoh» 1400 kmgacha parvoz masofasiga ega va har qanday havo mudofaa tizimi yoki raketaga qarshi mudofaa tizimini chetlab o‘tib, ularni yo‘q qilishga qodir. Shuningdek, xabarda aytilishicha, raketa radar tizimlari uchun ko‘rinmaslik xususiyatiga ham ega.
29 may kuni Amir-Ali Hojizoda Eron yangi gipertovushli raketani muvaffaqiyatli sinovdan o‘tkazganini ma’lum qildi. Hojizoda nutqidan ko‘p o‘tmay Eronning hukumatparast «Jam-i Jam» nashri «Tel-Avivga 7 daqiqa» sarlavhasi bilan maqola chop etdi. Maqola fors, ingliz va ivrit tillarida chop etilgan bo‘lib, unda IIMK tomonidan nafaqat Isroilga yetib borish, balki barcha raketalarga qarshi mudofaa va havo hujumiga qarshi mudofaa tizimlarini chetlab o‘tib, nishonga aniq zarba berishga qodir bo‘lgan gipertovushli raketani yaratish haqida so‘z yuritilgan.
