Bayden Xitoy razvedkasini tiyib turish bo‘yicha choralar qabul qildi

AQSh davlat kotibi Entoni Blinkenning aytishicha, Xitoyga qarshi razvedka xizmatlarining uchinchi davlatlar orqali ma’lumot to‘plash harakatlariga oid yangi ayblovlar Vashington va Pekin o‘rtasidagi ziddiyat mavzulari ro‘yxatini kengaytirmoqda. 12 iyun, dushanba kuni u Xitoy birmuncha vaqtdan beri Florida shtati janubidagi Kubadan Amerika Qo‘shma Shtatlari to‘g‘risidagi ma’lumotlarni to‘plash uchun foydalanayotganiga e’tibor qaratdi va shu tariqa tegishli OAV ma’lumotlarini tasdiqladi.

Blinkenning aytishicha, AQSh prezidenti Jo Bayden 2021 yil boshida lavozimga kirishgach, uning ma’muriyati Pekinning harbiy razvedka ma’lumotlarini yig‘ish uchun butun dunyo bo‘ylab logistika bazasini kengaytirish borasidagi sa’y-harakatlaridan xabardor bo‘lgan. Shu bilan birga, 2019 yilda Xitoy «Kubada razvedka ma’lumotlarini yig‘ish muassasalari faoliyatini yangiladi», dedi u. Davlat kotibi so‘zlariga ko‘ra, Bayden ma’muriyati avvalgi ma’muriyatning ba’zi sa’y-harakatlariga qaramay, XXRga nisbatan yetarlicha choralar ko‘rilmagan degan xulosaga kelgan, shu bois amaldagi prezident to‘g‘ridan to‘g‘ri javob berishni buyurgan.

O‘shandan beri rasman e’lon qilinmagan va natija bergan ba’zi qadamlar qo‘yildi, dedi Blinken tafsilotlarga to‘xtalmay. U, shuningdek, Vashington o‘z hududida Xitoy razvedka bazalarini joylashtirish imkoniyatini ko‘rib chiqayotgan davlatlar hukumatlari bilan aloqada ekanligini ta’kidladi. «Mutaxassislarimiz fikricha, diplomatik sa’y-harakatlarimiz XXRning bu urinishlarini sekinlashtirdi», — dedi u. 

Avvalroq The Wall Street Journal, Politico va boshqa nashrlar AQSh ma’muriyatidagi manbalariga tayanib, Kubada Xitoy razvedka xizmatlarining AQShga oid ma’lumotlarni to‘playdigan bazasi borligi haqida xabar bergan edi. WSJ ta’kidlaganidek, Kubada Amerika qirg‘oqlariga yaqinligi tufayli Xitoy Qo‘shma Shtatlar ayrim hududlarida elektron aloqalarni tutib olish, shuningdek, Amerika kemalarining harakatini kuzatish imkoniyatiga ega. 

10 iyun kuni AQSh ma’muriyati rasmiysi baza amaldagi ma’muriyat a’zolari lavozimga kirishishidan oldin tashkil etilgani, bu davom etayotgan muammo va Vashington uni hal qilish uchun harakat qilayotganini ta’kidladi. Amerika rasmiysiga ko‘ra, 2021 yil yanvariga kelib Kubada «Xitoyning razvedka ma’lumotlarini yig‘ish obektlari» ishlagan. «XXR 2019 yilda Kubadagi razvedka ma’lumotlarini yig‘ish vositalarini yangiladi. Bu razvedka ma’lumotlarida bor», - deya qo‘shimcha qildi u.