Donbassdagi janglar va Baxmut atrofidagi dala hospitali. Urush suratlari

Ukrainadagi urushning 481-kuni o‘tdi. Asosiy ma’lumotlar:

Aleksey Navalniy urush va Putinga qarshi tashviqot loyihasi boshlaganini e’lon qildi. Rejaga ko‘ra, kampaniya ishtirokchilari odamlarni Rossiyaning Ukrainaga bosqiniga qarshi «oyoqlantirishi» kerak.
Rossiya bosh prokuraturasi «Agora» xalqaro huquq himoyachilari guruhini «istalmagan» tashkilot deb e’lon qildi.
Rossiya BMTga Ukrainaning Kaxovka GESdagi falokatdan jabrlangan hududlariga kirishga ruxsat bermadi. Bu haqda BMTning Ukrainadagi humanitar muvofiqlashtiruvchisi Deniz Braun ma’lum qildi.
Ukraina mudofaa vazirligi Ukraina qurolli kuchlari Zaporijjya oblasti janubidagi Pyatixatki qishlog‘ini ozod etganini ma’lum qildi.
Buyuk Britaniya Moskva Kiyevga tovon puli to‘lamaguncha, Rossiyaga qarshi sanksiyalar saqlanib qolajagini bildirdi.
Davlat dumasi spikeri Vyacheslav Volodinga ko‘ra, urush boshlanganidan keyin mamlakatni tark etgan rossiyaliklarning teng yarmi qaytib kelgan. U qolganlarni ham «kallani ishlatish»ga chaqirgan.

Kun kadri. Donetsk yaqinidagi janglar

Ukraina qurolli kuchlari Ukraina janubida — Zaporijjya oblasti va uning Donetsk oblasti bilan chegara hududlarida qarshi hujumni davom ettirayotgan mahalda Rossiya qo‘shinlari Donetsk atrofida hujumlarni qaytadan boshladi. RF qurolli kuchlari Donetsk janubi-g‘arbidagi Maryinka shahridan janubda yurish boshlagan, shuningdek Donetskdan shimoldagi Avdiyivka atrofida harbiy harakatlar boshlangan.

Rossiya armiyasi ushbu ikki shaharni egallash uchun 2022 yildayoq harakat boshlagandi. Qishda RF qurolli kuchlari katta yo‘qotishlar evaziga Maryinka shahri markazini egallagan, shuningdek Avdiyivkadan shimol va janubdagi o‘rmonzor va dalalar bo‘ylab ilgarilagandi. Ammo Ukraina qurolli kuchlari hududdagi qo‘shinlari qurshovga tushishiga yo‘l qo‘ymadi hamda Donetskdan shimol va g‘arbdagi yo‘llar ustidan nazoratni saqlab qoldi.

Donetsk oblastidagi front chizig‘ida ko‘tarilgan tutun
Oleksandr Ratushniak / Reuters / Scanpix / LETA

Baxmut atrofidagi ukrain tankchilari va artilleriyachilari

Ukrainaning knyaz Konstantin Ostrojskiy nomidagi 30-mexanizatsiyalashgan brigadasi harbiylari 2022 yil kuzida Baxmut atrofida Rossiya qo‘shinlaridan o‘lja qilib olingan T-80 tankida ketmoqda.
EPA / Scanpix / LETA

Hududiy mudofaa qismlarining 60-batalonidan bo‘lgan ukrain harbiylari Donbassdagi bazada artilleriya zaryadlarini tayyorlamoqda
Wojciech Grzedzinski / Anadolu Agency / ABACAPRESS / ddp images / Vida Press

Hududiy mudofaa qismlarining 60-batalonidan bo‘lgan ukrain harbiylari rossiyaliklarning Baxmut atrofidagi pozitsiyalarini o‘qqa tutmoqda.
Wojciech Grzedzinski / Anadolu Agency / ABACAPRESS / ddp images / Vida Press

Baxmut atrofidagi ukrainalik harbiylar rossiyaliklarning pozitsiyalarini yuk mashinasiga o‘rnatilgan S-60 zenit zambaragidan o‘qqa tutmoqda
Wojciech Grzedzinski / Anadolu Agency / ABACAPRESS / ddp images / Vida Press

Ukraina qurolli kuchlarining Baxmut atrofidagi dala hospitali

Yarador ukrainalik harbiy Baxmut atrofidagi tibbiy yordam ko‘rsatish punktida
Libkos / AP / Scanpix / LETA

Xerson o‘qqa tutilishi oqibatlari

19 iyunga o‘tar kechasi Rossiya qo‘shini Xersonga zarba yo‘lladi — shaharda bir qancha yong‘inlar yuzaga keldi. Ukraina IIV xabariga ko‘ra, shahardagi yonilg‘i quyish shoxobchalaridan biridagi gaz saqlagich ham yonib ketgan. Shuningdek, korxonalardan birining hududida yong‘in chiqib, omborxona binosi, ko‘rgazmalar zali va xo‘jalik qurilmalari yonib ketgan. Oblast harbiy ma’muriyatiga ko‘ra, bir kishi jabrlangan.

Kaxovka GES to‘g‘onidagi vayrongarchilikdan so‘ng Belozerka, Dniprovsk, Novogredneve va Blahodatovka qatori Xersonning ham bir qismi hamon suv ostida qolmoqda. Bu aholi yashash manzillarida 843 ta turar joy binosini suv bosgan.