Toshkentda noqonuniy muomaladan olib qo‘yilgan 3,3 mlrd so‘mlik sigaret yo‘q qilindi

6 iyul kuni Toshkent shahrining Yangihayot tumanidagi zavodlardan birida davlat bojxona xizmati organlari tomonidan noqonuniy muomaladan olib qo‘yilgan 228 ming 144 quti tamaki mahsulotlarini keng jamoatchilik ishtirokida yo‘q qilish tadbiri o‘tkazildi.

Tadbirda bojxona, ekologiya, sanitariya-epidemiologiya xodimlari va majburiy ijro tuzilmalari xodimlari, ommaviy axborot vositalari vakillari ishtirok etdi.

Ma’lum qilinishicha, 2023 yil 22 fevral kuni Toshkent viloyati bojxona boshqarmasi xodimlari tomonidan boshqa idoralar vakillari bilan hamkorlikda poytaxtning Mirobod tumanidagi xonadonlardan birida o‘tkazilgan tezkor tadbirda xorijda ishlab chiqarilgan, noqonuniy yo‘llar bilan olib kirilgan 140 dan ziyod turdagi 228 ming 144 quti tamaki mahsulotlari qonunga xilof tarzda saqlanayotganligi aniqlangan.

*Tamaki mahsulotlarini yo‘q qilish jarayoni Foto: Kun.uz*

“Qiymati 3,3 mlrd so‘mlik 220 mingdan ziyod tamaki mahsulotlari yoqish yo‘li bilan yo‘q qilinmoqda. Sud hukmiga ko‘ra ushbu tamaki mahsulotlarini yo‘q qilish belgilangan”, - deydi Davlat bojxona qo‘mitasi matbuot mizmati bosh inspektori Husan Tangriyev.

Jurnalistlar, blogerlar va keng jamoatchilik vakillari guvohligida – 228 ming 144 quti sigaretlar yoqib yuborildi.

Rasmiylarga ko‘ra, 2023 yilning 6 oyida bojxona organlari tomonidan 155 ta huquqbuzarlik holatlarida 37,5 mlrd. so‘mlik 1 mln 610 ming quti sigaret tovarlarining noqonuniy realizatsiyasiga chek qo‘yilgan.

Mazkur huquqbuzarlik holatlari yuzasidan bojxona organlari tomonidan 53 ta holatda jinoyat ishlari qo‘zg‘atilgan, shuningdek 90 ta holatda ma’muriy ishlar yuritilib, ko‘rib chiqish uchun sudlarga yuborilgan.

Ta’kidlanishicha, O‘zbekiston hududiga tamaki mahsulotlarini asosan Turkiya, Rossiya, BAA, Tojikiston, Qirg‘iziston va boshqa davlatlardan noqonuniy tarzda olib kirishga urinilmoqda.

Ichki hududlar kesimida eng ko‘p noqonuniy sigaret mahsulotlari Namangan, Farg‘ona viloyatlari, Toshkent shahri, Toshkent va Qashqadaryo viloyatlari hissasiga to‘g‘ri keladi.

Eslatib o‘tamiz, Vazirlar Mahkamasining 2009 yil 25 iyuldagi “Davlat daromadiga o‘tkaziladigan mol-mulkni olib qo‘yish, sotish yoki yo‘q qilib tashlash tartibi to‘g‘risida”gi 200-son qaroriga muvofiq tamaki mahsulotlari majburiy tarzda yo‘q qilib tashlanishi belgilangan.