15 iyul kuni videoselektor rejimida o‘tkazilgan yig‘ilishda prokuratura organlari, shu jumladan, huquqni muhofaza qilish akademiyasi, bosh prokuratura huzuridagi iqtisodiy jinoyatlarga qarshi kurashish departamenti va majburiy ijro byurosi xodimlari ishtirok etgan. Bu haqda Bosh prokuratura matbuot xizmati xabar berdi.
Hay’at majlisida Bosh prokuror Nig‘matilla Yo‘ldoshev ma’ruza qilib, yangi tahrirdagi Konstitutsiya talablarining to‘liq va qat’iy bajarilishini ta’minlash prokuratura organlarining birinchi navbatdagi ustuvor vazifasi ekanligini alohida ta’kidlagan.
Qayd etilishicha, insonning huquq va erkinliklari qonunlar va davlat organlari faoliyatining mohiyati va mazmunini belgilashi haqidagi konstitutsiyaviy qoida prokuratura organlari faoliyatini tashkil etishning eng asosiy tamoyiliga aylanadi.
Yig‘ilishda barcha sohalarda nazorat faoliyatini amalga oshirishda, eng avvalo, Konstitutsiyaning davlat organlari va tashkilotlari, shu jumladan, sud va huquqni muhofaza qiluvchi organlar faoliyatida to‘g‘ridan to‘g‘ri va so‘zsiz qo‘llanishini ta’minlashga alohida e’tibor qaratish zarurligi uqtirilgan.
“Shu bilan birga, Konstitutsiya normalarini tergovga qadar tekshiruv, surishtiruv va dastlabki tergov faoliyatida qo‘llashning dolzarb masalalari ham muhokama qilindi. Xususan, bu faoliyatni amalga oshirishda inson huquq va erkinliklari, shaxsiy va oilaviy siri, uy-joy va mol-mulki daxlsizligini qat’iy ta’minlash, ulardan mahrum qilish yoki cheklashga faqatgina qonuniy asoslarga ko‘ra va sudning qaroriga asosan yo‘l qo‘yilishi har bir xodim e’tiboriga yetkazildi.
Shaxsni asossiz ushlash, qamoqqa olish, javobgarlikka noqonuniy tortish, qiynoq va boshqacha tarzdagi tazyiq holatlariga yo‘l qo‘ymaslikning zarur choralarini ko‘rish, bunday qonunbuzilishlarga nisbatan keskin munosabat bildirib borish barcha darajadagi prokurorlarning doimiy e’tiborida bo‘lishi qayd etildi.
Umuman, fuqarolar va davlatning qonuniy manfaatlarini himoya qilish, inson huquqlariga so‘zsiz rioya etilishini ta’minlash, Konstitutsiya va qonunlarni muhofaza qilish borasida prokuratura organlari faoliyatida bundan keyin keskin o‘zgarishlar bo‘lishi zarurligi belgilandi”, deyiladi rasmiy xabarda.
Hay’at yig‘ilishida prokuratura organlarining 2023 yil I yarim yillik faoliyat yakunlari haqida alohida so‘z yuritilgan. Ta’kidlanishicha, prokuratura organlari tomonidan o‘tgan yarim yilda aniqlangan qonun buzilish holatlari 91 mingdan ortiq nazorat hujjatlarini qo‘llash orqali bartaraf etilgan, 225 ming nafar fuqaroning buzilgan huquqlari tiklangan.
