Maktabgacha va maktab ta’limi vazirligining ta’minot xizmati kompyuterlar xaridi uchun qariyb 95 mlrd so‘mlik 5 ta tender o‘tkazdi. Vazirlikning oldingi tenderlari kabi bu safargisida ham shubhali holatlar bor. Antimonopol qo‘mita negadir bu vaziyatga ko‘z yumgan.
Maktabgacha va maktab ta’limi vazirligi huzuridagi “Ta’minot va logistika xizmati” DUK tomonidan joriy yil 24 iyun kuni kompyuterlar xaridi uchun 5 ta lotda jami 94,7 mlrd so‘mlik tenderlar o‘tkazilgan.
Ularning ikkitasini bitta firma, yana ikkitasini esa bir odamga tegishli ikkita firma yutib olgan. Bir holatda esa tender o‘tkazish shartlari buzilgan bo‘lishi mumkin.
1-holat. 11,6 mlrd so‘m
Qoraqalpog‘iston Respublikasi va Xorazm viloyatidagi maktablar uchun kompyuter va boshqa texnik vositalar xarid qilish maqsadida 11 mlrd 880 mln so‘m boshlang‘ich narx bilan tender o‘tkazilgan. Unda “IT Matrix” MChJ g‘olib deb topilgan va u bilan 11 mlrd 650 mln so‘mlik shartnoma imzolangan.
Bu mablag‘ evaziga yuqoridagi hududlarga o‘qituvchi va o‘quv ishlari bo‘yicha direktor o‘rinbosarlari uchun 138 dona hamda o‘quvchilar uchun 1035 dona kompyuter, 69 dona printer va boshqa texnik vositalar yetkazib berish ko‘zda tutilgan.
“IT Matrix” MChJ 2018 yil davlat ro‘yxatidan o‘tkazilgan. Faoliyat turi – yog‘och, qurilish materiallari va sanitariya-texnik uskunalar ulgurji savdosi. Ta’sischisi – Ziyod Usmonov.
2-holat. 22,2 mlrd so‘m
Toshkent shahri, Toshkent, Sirdaryo hamda Jizzax viloyatlaridagi maktablar uchun kompyuter va boshqa texnik vositalar xarid qilish maqsadida 22 mlrd 398 mln so‘m boshlang‘ich narx bilan tender o‘tkazilgan. Tenderda “Rower Systems” MChJ g‘olib deb topilgan hamda u bilan 22 mlrd 295 mln so‘mlik shartnoma imzolangan.
Shartnomaga ko‘ra, g‘olib firma ushbu mablag‘ evaziga yuqoridagi hududlarga o‘qituvchi va o‘quv ishlari bo‘yicha direktor o‘rinbosarlari uchun 260 dona hamda o‘quvchilar uchun 1950 dona kompyuter, 130 dona printer va boshqa texnik vositalar yetkazib berish ko‘zda tutilgan.
“Rower Systems” MChJ 2014 yilda davlat ro‘yxatidan o‘tkazilgan. Unga Otabek va Baxtiyor Abduvaliyevlar egalik qiladi. MChJ texnika va uskunalar ulgurji savdosi bilan shug‘ullanadi.
3-holat. 19,8 mlrd so‘m
19 mlrd 986 mln so‘m boshlang‘ich narx bilan Qashqadaryo va Surxondaryo viloyatlaridagi maktablar uchun kompyuter va boshqa texnik vositalar xarid qilish maqsadida tender o‘tkazilgan. Ushbu tenderda ham “Rower Systems” MChJ g‘olib deb topilgan hamda u bilan 19 mlrd 894 mln so‘mlik shartnoma imzolangan.
Shartnomada ko‘rinishicha, ushbu mablag‘ga o‘qituvchi va o‘quv ishlari bo‘yicha direktor o‘rinbosarlari uchun 232 dona hamda o‘quvchilar uchun 1740 dona kompyuter, 116 dona printer va boshqa texnik vositalar yetkazib berish ko‘zda tutilgan.
4-holat. 18,7 mlrd so‘m
Buxoro, Navoiy hamda Samarqand viloyatlaridagi maktablar uchun kompyuter va boshqa texnik vositalar xarid qilish maqsadida 19 mlrd 124 mln so‘m boshlang‘ich narx bilan tender o‘tkazilgan. Unda “Stand Komputers” MChJ g‘olib deb topilgan hamda u bilan 18 mlrd 742 mln so‘mlik shartnoma imzolangan.
Shartnomaga ko‘ra, g‘olib firma ushbu mablag‘ evaziga yuqoridagi hududlarga o‘qituvchi va o‘quv ishlari bo‘yicha direktor o‘rinbosarlari uchun 222 dona hamda o‘quvchilar uchun 1665 dona kompyuter, 111 dona printer va boshqa texnik vositalar yetkazib berish ko‘zda tutilgan.
5-holat. 22,1 mlrd so‘m
Andijon, Namangan hamda Farg‘ona viloyatlaridagi maktablar uchun kompyuter va boshqa texnik vositalar xarid qilish maqsadida 22 mlrd 570 mln so‘m boshlang‘ich narx bilan tender o‘tkazilgan. Tenderda “Stand Trade” MChJ g‘olib deb topilgan hamda u bilan 22 mlrd 119 mln so‘mlik shartnoma imzolangan.
Ushbu mablag‘ evaziga yuqoridagi hududlarga o‘qituvchi va o‘quv ishlari bo‘yicha direktor o‘rinbosarlari uchun 262 dona hamda o‘quvchilar uchun 1965 dona kompyuter, 131 dona printer va boshqa texnik vositalar yetkazib berish ko‘zda tutilgan.
Yuqoridagi ikkita MChJ – “Stand Komputers” va “Stand Trade”ga Abdihomid Valiyev egalik qiladi.
4-holat bo‘yicha o‘tkazilgan tenderda “Stand Komputers” MChJga, 5-holat bo‘yicha o‘tkazilgan tenderda esa “Stand Trade” MChJga bitta firma – “Buld Project Special” MChJ “raqiblik” qilgan.
E’tiborlisi, har ikki lotda g‘olib firmalarga yagona raqib bo‘lgan “Buld Project Special” MChJning manzili, telefon raqami hamda elektron pochtasi 7 iyul kuniga qadar “Stand Komputers” MChJniki bilan bir xil bo‘lgan. 18 iyul holatida esa ushbu ma’lumotlarga o‘zgartirish kiritib qo‘yilganini ko‘rish mumkin. Bu mazkur tenderlarda sog‘lom raqobat bo‘lmagan, raqiblik sun’iy uyushtirilgan, degan shubhani yuzaga keltiradi.
“Ta’minot va logistika xizmati” DUK tomonidan o‘tkazilayotgan tenderlar doim shubhali bo‘lmoqda: “Prezident sovg‘asi” uchun o‘tkazilgan tenderda g‘olib firmalar bilan milliardlab so‘m qimmat narxda shartnoma imzolangan bo‘lsa, yana bir holatda sport buyumlari bo‘yicha tender g‘olibligini “qandolatchi”, ryukzaklar bo‘yicha esa “chinnichi” qo‘lga kiritgandi. Ammo na vazirlik, na Antimonopol qo‘mitasi va na Korrupsiyaga qarshi kurashish agentligi bu holatlarga hozircha munosabat bildirgani yo‘q.
