AQSh harbiy-dengiz floti rahbari lavozimiga birinchi marta ayol nomzodi ilgari surildi

AQSh prezidenti Jo Bayden tarixda ilk bor AQSh harbiy-dengiz floti shtab boshlig‘i lavozimiga ayol admiral Liza Franketti nomzodini ilgari surdi. Oq uy tegishli press-relizni 21 iyul, juma kuni e’lon qildi. Franketti nomzodi hali AQSh Senati tomonidan tasdiqlanishi kerak. 

Franketti hozir AQSh harbiy-dengiz floti boshlig‘ining operatsiyalar bo‘yicha o‘rinbosari. Ilgari u O‘rta Yer dengizidagi AQShning 6-flotiga va Koreyadagi ikkita aviatashuvchi hujum guruhiga qo‘mondonlik qilgan va Amerika Qo‘shma Shtatlari armiyasi shtab boshliqlari birlashgan qo‘mitasining strategiya, rejalar va siyosat bo‘yicha direktori lavozimida ishlagan. Franketti nomzodini e’lon qilar ekan, Bayden uning armiyadagi 38 yillik tajribasini ta’kidladi. 

Frankettidan tashqari AQSh prezidenti dengiz flotining operatsiyalar bo‘yicha boshlig‘i o‘rinbosari lavozimiga vitse-admiral Jyeyms Kilbini, Hind-Tinch okeani qo‘mondonligi rahbari lavozimiga esa admiral Samuel Paparoni taklif qildi. Ilgari Paparo AQSh HDF shtab boshlig‘i lavozimiga eng ehtimoliy nomzod deb hisoblangan. AQSh harbiy-dengiz flotining amaldagi qo‘mondoni admiral Mayk Gildey iste’foga chiqadi. 

Admiral Liza Frankettining Senatda AQSh HDF qo‘mondoni lavozimiga nomzodi kechiktirilishi mumkin, deb yozadi CNN. Respublikachi senator Tommi Tubervil bir necha oy davomida AQSh Mudofaa vazirligining reproduktiv salomatlik siyosatiga norozilik sifatida Pentagonning bir necha yuqori mansabdor shaxslarini tayinlashga to‘sqinlik qilmoqda.

Jo Bayden Tubervilning pozitsiyasini qoralab, uni «nafaqat noto‘g‘ri, balki xavfli» deb atadi. «Amerika xalqi harbiylarimiz va ularning oilalari yonida, - dedi prezident. - Men Senatdan muhim harbiy tayinlovlarni imkon qadar tezroq tasdiqlashni so‘rayman». 

2022 yilda Bayden admiral Linda Feganni Qo‘shma Shtatlar Sohilni qo‘riqlash xizmati boshlig‘i etib tayinladi. Biroq, Sohilni qo‘riqlash xizmati Mudofaa vazirligiga emas, balki AQSh Ichki ishlar vazirligiga tegishli.