AQSh delegatsiyasi “Tolibon” bilan Dohada muhim uchrashuv o‘tkazdi. Asosiy muloqotlar 30-31 iyul kunlari bo‘lib o‘tgan. Rasmiy Vashington doimgidek o‘z e’tiborini eski talablar va bajarilishi kerak bo‘lgan majburiyatlarga qaratdi.
Davlat departamentining ma’lum qilishicha, Dohadagi uchrashuvda AQSh delegatsiyasi tarkibida Afg‘oniston bo‘yicha maxsus vakil Tomas Uest, Afg‘oniston ayollari, qizlari va inson huquqlari bo‘yicha maxsus elchi Rina Amiriy, Dohada joylashgan AQShning Afg‘oniston bo‘yicha missiyasi rahbari Karen Deker bo‘lgan.
Muloqotda, avvalo, gumanitar inqiroz davom etayotgani inobatga olinib, insonparvarlik yordamini to‘xtatmaslik muhimligi aytilgan.
AQShga ko‘ra, BMT organlari bu ishga bosh-qosh bo‘lishi kerak. Uchrashuvda amerikalik rasmiylar Afg‘onistondagi inson huquqlari va xususan ayollar, xotin-qizlar, himoyasiz jamoalarga bo‘layotgan munosabatdan xavotirda ekanini bildirgan. Vashington “Tolibon”dan ularga nisbatan siyosatni o‘zgartirishni talab qildi.
Bundan tashqari, AQSh rasmiylari hibsga olishlar, ommaviy axborot vositalari erkinligiga qarshi tahdid va ta’qiblar, diniy erkinlikka bo‘layotgan cheklovlardan jiddiy xavotirini ma’lum qildi.
Afg‘on xalqining huquqlarini hurmat qilish kerak, mamlakat kelajagini shakllantirish uchun ularning ovozi va talablari juda muhim, degan Vashingtondan kelganlar.
Afg‘oniston iqtisodiyotida nima yangilik?
AQSh delegatsiyasining Afg‘oniston Markaziy banki va Moliya vazirligi vakillari bilan uchrashuvida mamlakat iqtisodiyotining ahvoli va bank sektori duch kelayotgan muammolar muhokama qilingan. Bu borada Amerika “Tolibon” davridagi iqtisodiy o‘zgarishni tan oldi.
Ya’ni AQSh 2023 yilda Afg‘onistonda inflatsiya pasayib borayotgani, ma’lumotlar tovar eksporti va importi o‘sishini ko‘rsatayotganini tasdiqladi. Bundan buyog‘iga iqtisodiyotni barqarorlashtirish bo‘yicha texnik muloqotga Vashington ochiqligi bildirildi.
Aniqroq talablar
Davlat departamenti xabariga ko‘ra, Afg‘oniston hududidan boshqa davlatlar, xususan AQSh va uning ittifoqchilariga tahdid bo‘lmasligi kerak. Bu masala bo‘yicha “Tolibon” jiddiy ogohlantirilgan. Xavfsizlik masalalari bo‘yicha hukumat o‘z majburiyatlarini bajarishi kerak.
