Bayden Kongressdan Kiyevga 13 mlrd dollarlik harbiy yordam ko‘rsatishni so‘radi

AQSh prezidenti Jo Bayden 10 avgust, payshanba kuni Kongressga boshqa mamlakatlarga yordam, chegaralarni himoya qilish va tabiiy ofat oqibatlarini bartaraf etish uchun 40 milliard dollar miqdorida qo‘shimcha mablag‘ ajratish so‘rovini yubordi. Ularning 24 milliardi bevosita yoki bilvosita Ukraina uchun mo‘ljallangan. Xususan, 13,1 milliard Kiyevga harbiy yordam va bu borada Pentagon arsenalini to‘ldirish uchun, yana 8,5 milliardi Ukraina va ushbu mamlakatdagi vaziyatdan jabr ko‘rgan boshqa mamlakatlarga iqtisodiy, humanitar va boshqa yordamga yo‘naltirilishi kerak. «Vagner» XHK va Afrikada boshqa shunga o‘xshash tuzilmalarga qarshi kurashish uchun 200 million dollar ham so‘ralgan. 

Ma’muriyat yuqori martabali mulozimining Reuters’ga aytishicha, bu miqdor 2024-moliyaviy yilning birinchi choragi uchun ehtiyojlarni qoplaydi. 

AQSh aholisi Ukrainaga yordam berish borasida yakdil pozitsiyada emas

Oq uyning strategik kommunikatsiyalar bo‘yicha koordinatori Jon Kirbi Baydenning Kongressga Kiyevga ko‘proq yordam so‘rab qilgan yangi murojaatiga izoh berar ekan, Amerika aholisi Rossiyaning Ukrainaga qarshi urushida o‘rtada nimalar turganini tushunishiga ishonch bildirdi. 

Sotsiologlarning ma’lumotlari shuni ko‘rsatadiki, Amerika jamiyatida Ukrainaga yordam ko‘rsatish bo‘yicha birdamlik yo‘q. CNN tomonidan o‘tkazilgan so‘rov natijalariga ko‘ra, respondentlarning 55 foizi Kongress Ukraina qurollari uchun qo‘shimcha mablag‘ ajratishga rozi bo‘lmasligi kerak, deb hisoblaydi. Respondentlarning 51 foizi Qo‘shma Shtatlar allaqachon Kiyevga yetarlicha yordam ko‘rsatgan, degan fikrda.