Norvegiyada Rossiya avtomobillarining kirishiga taqiq kuchga kirdi

Norvegiyada 3 oktyabr, seshanba kuni salonida to‘qqiz yoki undan kam o‘rindiqli Rossiyada ro‘yxatdan o‘tgan yengil avtomobillarning kirishiga taqiq kuchga kirdi. Chora shuningdek, oraliq importni taqiqlashni ham o‘z ichiga oladi, deya tushuntirdi Qirollik Tashqi ishlar vazirligi.

Cheklovlar Rossiyada doimiy yashovchi Yevropa Ittifoqi va Norvegiya fuqarolariga tegishli transport vositalariga taalluqli emas. Cheklovlar diplomatik transport va xalqaro tashkilotlarga tegishli avtomobillarga ham tegishli bo‘lmaydi. Bundan tashqari, rossiyaliklar, shuningdek, oilaviy favqulodda vaziyatlarda, masalan, dafn marosimiga borish zarurati tug‘ilganda, Norvegiyaning Rossiya bilan chegarasini avtomobilda kesib o‘tishi mumkin.

Oslo: Rossiyaning Ukrainaga qarshi noqonuniy urushiga javob

Norvegiya hukumati veb-saytidagi xabarda aytilishicha, Oslo Rossiyaning Ukrainaga qarshi noqonuniy urushiga javob sifatida Moskvaga nisbatan cheklov choralarini kuchaytirmoqda va shu kabi sanksiyalarni joriy etgan YeI mamlakatlariga qo‘shilgan.

Norvegiya Rossiya ro‘yxatidan o‘tgan avtomobillarning kirishini taqiqlagan Rossiya bilan quruqlikda chegaradosh so‘nggi davlatga aylandi. Avvalroq Estoniya, Latviya, Litva, Finlandiya va Polsha Yevropa komissiyasining tegishli tushuntirishiga asoslanib, xuddi shunday qadam tashlagan edi. 2 oktyabr kuni ularga Bolgariya ham qo‘shildi, u Shengen hududidan tashqarida Yevropa komissiyasining ushbu tavsiyasini qo‘llab-quvvatlagan birinchi davlat bo‘ldi.

Taqiq qabul qilingandan so‘ng Finlandiya Norvegiya bilan chegarada Rossiya avtomobillarining bu mamlakat orqali kirib kelishini to‘xtatish uchun kecha-yu kunduz nazoratni joriy qildi. Rossiya va Norvegiya o‘rtasidagi chegara uzunligi taxminan 200 kilometrni tashkil qiladi.