2021 yilda Jizzax erkin iqtisodiy zonasida faoliyatini yo‘lga qo‘ygan “ADM Jizzakh” avtomobilsozlik zavodi 2024 yildan butunlay yangi bosqichga o‘tadi va avtomobillarning to‘liq ishlab chiqarilishini yo‘lga qo‘yadi.
Mazkur zavodning keng qamrovli faoliyati, ishlab chiqarish bilan bog‘liq jarayonlar, ishchi-xodimlar malakasi, tajribasini oshirish uchun yaratilgan imkoniyatlar bilan yaqindan tanishtirish maqsadida bir guruh jurnalist va blogerlar uchun press-tur tashkil qilindi.
Ommaviy axborot vositalari vakillari bilan suhbat davomida Bosh direktor Daniyar Davletiyarov zavod to‘liq quvvat bilan ishlashi uchun so‘nggi ishlar olib borilayotgani, bir qator ishchi-xodimlar esa soha bo‘yicha yetakchi mamlakatlarda tajriba oshirib kelgani haqida ma’lumot berdi.
Deyarli 100 gektar maydonda joylashgan ushbu zavodni, avtomobilsozlik mahsulotlarini ishlab chiqarish markazini yaratishga qaratilgan to‘laqonli texnologik shahar, deb atash mumkin. Loyiha bir necha bosqichda amalga oshirilmoqda.
Birinchi bosqich –avtomobillarni SKD usulida, ya’ni yirik uzelli ishlab chiqarish usulida, yig‘ish 2020 yilda boshlangan bo‘lib, 2021 yil mart oyida muvaffaqiyatli ishga tushirilgan. Hozirgi kunga qadar “Kia”, “Chery”, “Haval” va hokazo brendlar ostida umumiy qiymati 7,3 trillion so‘mdan ortiq bo‘lgan 33 mingdan ziyod avtomobillar ishlab chiqarilgan.
Bu vaqt davomida Jizzax, Sirdaryo va Samarqand viloyatlaridan 1200 nafardan ortiq yosh ishchi va mutaxassislar ish bilan ta’minlandilar. Shundan qariyb 100 nafari xotin-qizlardir.
Hozirgi vaqtda zavod to‘liq ishlab chiqarish jarayonlarini o‘zlashtirish va avtokomponentlarni mahalliylashtirish bosqichiga o‘tgan.
Press-tur ishtirokchilari aynan mana shu jarayonlar bilan yaqindan tanishdilar. Ya’ni, kompaniya tomonidan yirik uzelli yig‘ish uslubini o‘zlashtirish bilan bir qatorda kuzovlarni payvandlash, bo‘yash, avtomobillarni yig‘ish va yakuniy sinovdan o‘tkazishdan iborat bo‘lgan to‘liq ishlab chiqarish jarayonlarini o‘zlashtirgan holda avtomobillarni ishlab chiqarishni yo‘lga qo‘yish bo‘yicha ishlar olib borilmoqda. Kiritiladigan ishlab chiqarish quvvati yiliga 100 000 dona avtomobilni tashkil qiladi. Qisqa qilib aytganda, kelasi yildan boshlab “ADM Jizzakh” zavodida avtomobillar to‘liq ishlab chiqariladi.
