O‘zbekistonda muvaffaqiyatli xotin-qizlarga bag‘ishlangan filmlar suratga olinadi

Maktablardagi biologiya va tarbiya fanlari oilaga tayyorgarlikni ta’minlovchi mavzular guruhi bilan to‘ldiriladi. Bu haqda 21 dekabrdagi oilalarni mustahkamlash va xotin-qizlarning faolligini oshirish to‘g‘risidagi prezident qarorida so‘z boradi.

Kinoijodkorlarga xotin-qizlarni ijtimoiy-iqtisodiy faollikka chorlovchi, ularning ijtimoiy-iqtisodiy faoliyati oiladagi tinchlik va vatan ravnaqiga ijobiy hissa qo‘shishi, yaqinlari ko‘magi bilan yuksak yutuqlarga erishgan xotin-qizlarning hayotini yorituvchi, oilaviy zo‘ravonlikni qoralovchi kinofilm va ijtimoiy reklamalarni ishlab chiqish tavsiya etiladi.

Umumta’lim maktablaridagi yuqori sinflar uchun ona tili va adabiyoti hamda chet tili fanlarini o‘qitish bo‘yicha mavzularni tanlashda oilaning muqaddasligi, oila a’zolarining bir-birlari oldidagi ma’naviy javobgarligini yorituvchi mavzularga ustuvorlik beriladi.