Vazirlar Mahkamasining 2026-yil 19-oktabrdagi 575-son qarori bilan Ibn Sino ilmiy merosini chuqur oʻrganish va keng targʻib qilish boʻyicha 2030-yilgacha moʻljallangan «yoʻl xaritasi» tasdiqlandi. Hujjatda 2030-yilda alloma tavalludining 1050-yilligini nishonlashga tayyorgarlik koʻrish ham nazarda tutilgan.
«Husayn» filmi 2027-yilda namoyishga tayyorlanadi
Filmda Husayn ibn Abdullohning tabobatga muhabbati, ustozlariga sadoqati va insonparvarligi orqali bolalar uchun axloqiy namuna yaratish maqsad qilingan.
«Yoʻl xaritasi»ga koʻra, filmni suratga olish 2026-yil oktabrga, montaj, ovoz berish, musiqiy bezak va ranglarga ishlov berish ishlarini yakunlash esa 2027-yil iyunga belgilangan. Premyerani ham 2027-yil iyunda oʻtkazish rejalashtirilgan.
2027-yil sentabrda filmni kinoteatrlar, telekanallar va raqamli platformalar orqali tomoshabinlarga yetkazish, taʼlim muassasalarida namoyishlar va ijodkorlar bilan uchrashuvlar tashkil etish koʻzda tutilgan.
2028-yil martda esa xorijiy tillarda subtitrli nusxalar tayyorlab, filmni xalqaro kinofestivallarga taqdim etish hamda xorijiy distribyutorlar va striming platformalari bilan muzokaralar olib borish belgilangan.
Buxoroda ilmiy-tadqiqot markazi ochiladi
Qaror bilan Buxoro davlat tibbiyot instituti huzurida davlat muassasasi shaklida Abu Ali ibn Sino ilmiy-tadqiqot markazini tashkil etish taklifi maʼqullangan.
Markaz allomaning tibbiyotga oid merosini tadqiq qilish, ilmiy nashrlar va oʻquv materiallarini tayyorlash, xalqaro ilmiy loyihalarda qatnashish bilan shugʻullanadi. Tibbiyot xodimlari va tibbiyot tarixiga qiziquvchilar uchun oʻquv kurslari hamda mahorat darslarini yoʻlga qoʻyish ham uning vazifalariga kiritilgan.
Markaz Buxoro davlat tibbiyot instituti binosiga tekin foydalanish huquqi asosida joylashtiriladi. Uni moliyalashtirishda institutning byudjetdan tashqari mablagʻlari, xalqaro grantlar, pulli xizmatlar tushumlari va homiylik xayriyalaridan foydalaniladi.
Qoʻlyozmalar raqamlashtirilib, asarlar oʻzbekchaga tarjima qilinadi
2030-yilga qadar Ibn Sinoning xorijiy va mahalliy arxiv-kutubxonalarda saqlanayotgan qoʻlyozmalari, asarlari va nashrlarining raqamli nusxalarini yagona bazada jamlash rejalashtirilgan.
