AQShning Iroqdagi bazasiga uchuvchisiz uchoq tomonidan uyushtirilgan hujum oqibatida uch nafar amerikalik harbiy jarohat oldi. Pentagon Eron tomonidan qo‘llab-quvvatlangan guruhning uchta obektiga havo hujumi uyushtirilganini e’lon qildi.
Eron tomonidan qo‘llab-quvvatlangan jangchilar tomonidan Iroq va Suriyadagi amerikalik harbiylarga bir qator hujumlarga javoban AQSh harbiylari Iroqdagi guruh tomonidan foydalaniladigan uchta obektga zarba berdi. Bu haqda Pentagon rahbari Lloyd Ostin 25 dekabr kuni kechqurun ma’lum qildi.
Uning ta’kidlashicha, «zarur va mutanosib» aniqlikdagi havo hujumlari AQSh prezidenti Jo Bayden ko‘rsatmasi bilan amalga oshirilgan.
AQSh harbiylarining dastlabki ma’lumotlariga ko‘ra, amaliyot natijasida «Hizbulloh»ning bir qancha jangchilari yo‘q qilingan, ular ishlatgan obektlar vayron bo‘lgan. «Ushbu zarbalar Iroq va Suriyadagi koalitsiya kuchlariga hujumlar uchun bevosita mas’ul bo‘lgan jangchilarni javobgarlikka tortish va ularning keyingi hujumlarni amalga oshirish imkoniyatlarini cheklash uchun mo‘ljallangan», — dedi AQSh Markaziy qo‘mondonligi rahbari general Maykl Kurilla.
AQSh harbiylari Iroqdagi bazaga dron hujumi oqibatida jarohat oldi
Avvalroq, guruh Iroq shimolidagi kurdlar nazorati ostidagi mintaqada AQShning Erbil havo bazasiga kamikadze-dronlar bilan hujum qilgandi, hodisa oqibatida uch amerikalik harbiy jarohat olgan.
7 oktyabrda HAMAS jangchilarining Isroilga hujumi hamda Isroil va HAMAS tashkiloti o‘rtasida urush boshlanganidan so‘ng Iroq va Suriyadagi AQSh bazalariga hujumlar sezilarli darajada oshdi. Oktyabr oyi o‘rtalaridan beri AQSh harbiylari 100 dan ortiq shunday hujumlarni qayd etgan. Ularning aksariyati Iroqda sodir etilgani uchun eronparast koalitsiyaga aloqador qurolli guruhlarning erkin ittifoqi javobgarlikni o‘z zimmasiga oldi.
Iroqda 2500 ga yaqin, Suriyada esa 900 ga yaqin amerikalik askar joylashgan. Bu mamlakatlarda AQSh boshchiligidagi harbiy koalitsiya IShID guruhi qayta tiklanishining oldini olishga yordam berishni maqsad qilgan.
